'Israeli boikota: zertarako eta nola' hitzaldia egongo da Lekeition
Lekeitio-Palestina Elkartasun Taldeak antolatu du hitzaldia; eguenean [martxoak 13] 18:30ean izango da, kultur etxeko Azkue aretoan. Euskal Herriko BDZko kideek emango dute hitzaldia.
Lekeitio-Palestina Elkartasun Taldeak Israeli boikota: zertarako eta nola hitzaldia antolatu du. Eguenean [martxoak 13] ipini dute hitzordua, 18:30ean, Lekeitioko kultur etxeko Azkue aretoan. Jakinarazi dutenez, hitzaldia Euskal Herriko BDZko (Israeli Boikota, Desinbertsioak eta Zigorrak) kideek emango dute.
Lekeitiarrek aitortu dutenez, sarri “inpotentzia sentsazioa” eduki ohi dute, Palestinatik heltzen diren irudi gogorrak ikusi eta euren ekarpena “modu eraginkorrean” zelan egin ez dakitela. Halaber, lekeitiarren ustetan bikota izan daiteke “ekarpen eraginkorra” egiteko modua, eta ezinbestekotzat jo dute Palestinaren aldeko mobilizazio iraunkorrez gain, Israel entitatearen aurkako boikot dinamikak indartzea: “Israelek nazioarte mailan ahalik eta gaitzespen handiena eta ahalik eta babes gutxien izateak sarraskia gelditzen eta okupazioaren amaitzen lagundu dezake”.
BDZkoek argituko dituzte euren zalantzak. Izan ere, boikotaren inguruko nondik norakoak azalduko dituzte, modu zehatzean. Euskal Herriko mugimendua izango da Lekeition hitzaldia emango duena, baina, mundu mailako mugimendu baten parte dira: “Zeregina eta helburua, Palestinako askapen mugimenduak eskatu bezala, Palestinaren askapenean eta okupazio eta kolonizazioaren amaierarekin laguntzea da”. Hori horrela, euren “tresna nagusia” boikota eta presioa dira, Israel entitatea legitimatzeko erabiltzen dituzten erakundeen aurka, baita Israel entitatearekin “harreman poitiko, instituzional eta, batez ere, ekonomikoak dituzten eragile eta enpresen aurka”.
Lekeitio-Palestina Elkartasun Taldeak deituta 10 orduko elkarretaratzea egin zuten iaz, abenduaren 28an.Lekeitio-Palestina Elkartasun Taldea
