Mundu Zabal elkarteak bere jarduna eten du
25 urtean 43 proiektu desberdinetarako milioi bat eurotik gora batu ditu elkarteak.
1999an bere ateak ireki zituenetik hainbat proiektu eroan ditu aurrera Markina-Xemeingo Mundu Zabal gobernuz kanpoko elkarteak. 25 urteko ibilbidearen ostean, euren jarduna etetea erabaki dute. Guztira 43 proiektu desberdinetan erabiltzeko milioi bat eurotik gora batu ditu elkarteak. Proiektu horietako bat izan zen 2019an martxan ipini zutena: Mundukidegaz konpromiso bat hartu, eta Mundukide Kolonbiako Pasto hirian gauzatzen ari zen programara 50.000 euro bideratzea. Hala, 2019an bertan, 23.400 euro lortu zituzten proiekturako.
Markina-Xemeingo Udalak eskerrak eman nahi izan dizkiete Mundu Zabal elkarteko kideei: “Gure eskerrik beroena urte guzti hauetan hainbat herritarrek mundu osoko komunitate oso behartsuen bizi baldintzak hobetzeko modu solidarioan egindako lanari”.
