Ados pilotaren Binakako Txapelketa hartuko du zapatuan Lekeitiok
Lehen mailako bi partida ikusteko aukera egongo da, 17:30etik aurrera. Sarrerak salgai daude Santi Brouard udal kiroldegian.
Joan den abenduaren 21ean hasi zen Ados Pilota Klubak Binakako Txapelketako lehia, eta zapatuan [martxoak 15] Lekeitiora helduko da. Hiru hilabete norgehiagoka da martxan dagoena, eta hogei pilotari ari dira lehian. Hala, txapelketa amaitzeko bidean daude jada pilotariak: martxoaren 29an izango da finala, Iruñeako Labrit pilotalekuan.
Lekeitioko partidak, beraz, erabakigarriak izango dira. Hala, zapatuan [martxoak 15] 17:30ean goi mailako pilotariak ikusteko aukera egongo da. Lehen mailako bi partida jokatuko dituzte, eta tartean iazko irabazleek jokatuko dute (Ruiz de Infante eta Galeano), bikote desberdinekin. Alde batetik, Barrokal eta Arrastia ariko dira Ruiz de Infante eta Orbegozoren aurka. Bestetik, Arrieta eta Galeanok jokatuko dute Oskozen eta Agirreren aurka.
Aurtengo sailkapenari begira, jada finalerdietan daude Lekeition jokatuko duten bikoteetako bi, Barrokal-Arrastia eta Ruiz de Infante-Orbegozo, hain zuzen ere. Era berean, antolatzaileek adierazi dutenez, Oskoz-Agirre bikoteak ere, aukera asko du finalaurrekoetara sailkatzeko.
Sarrerak eskuragarri daude bost euroren truke Santi Brouard udal kiroldegian; egunean bertan, ostera, pilotalekuan egongo dira salgai.
