Etxebarriko zaldi probak apirilaren 11tik 14ra izango dira
Sariketan parte hartu nahi dutenek martxoaren 23an eman beharko dute izena, Etxebarriko udaletxean.
Pazkoetako idi proben ostean, zaldi mandoen eta kinttopekoen sariketa hartuko du Etxebarriak, apirilaren 11tik 14ra. Parte hartu nahi dutenek martxoaren 23an, 13:00etan, Etxebarriko Udalaren bulegoetan eman beharko du izena; zalantzarik izanez gero, 94-616 64 32 telefonoa ahalbidetu dute.
Urtero bezala, Etxebarriko 800 kiloko harria erabili beharko dute parte hartzaileek, 50 kiloko txapagaz batera. Abereek, gehienez ere, 400 kilo eduki beharko dituzte; pisaketa saio bakoitza baino ordubete lehenago egingo dute. Hortik gorako zaldia izanez gero, gainkarga izango du: kilo bakoitzeko, kilo bat. Horrez gain, zaldi bakoitzak bi itzain libre eroango ditu.
Saio bakoitzak 30 minutu iraungo ditu, eta udalak jakitera eman duenez lehiaketa Euskal Herriko Kirol Federazioak kontrolatuko du, ohiko legez.
Sari potoloak. Guztira, gutxienez, hamar sari banatuko dituzte. Irabazleak 800 euro, manta eta txapela eskuratuko ditu; bigarren postutik hamargarrenera 700, 600, 550, 500, 450, 400, 350, 330 eta 320 euro irabaziko dituzte. Gainontzekoek 300 euroko dieta jaso ahal izango dute txapeldunaren markaren %70 egiten badute. Lea-Artibaiko onenak, ostera, 120 euroko saria jasoko du; bigarrenak, 100 eurokoa; eta hirugarrenak, 90 eurokoa. Bestalde, kinttopekoen artean lau sari banatuko dituzte. Lehenengoarentzat, 300 euro eta txapela; bigarrenarentzat, 200 euro; hirugarrenarentzat, 150; eta laugarrenarentzat, 100 euro.
