Lekeitioko Udako Arte Erakusketan izena emateko epea zabalik dago
Erakusketa uztailaren 8tik abuztuaren 24ra bitartean egongo da, eta izena emateko epea apirilaren 13an [domeka] itxiko da.
Lekeitioko Eskolape Aretoa artearen erakusleiho bihurtuko da uztailaren 8tik abuztuaren 24ra. Hala, erakusketan parte hartu nahi duten artistek apirilaren 13ra [domeka] arte edukiko dute proposamenak aurkezteko aukera. Aniztasunaren isla izateko helburuagaz, alor ezberdinetako artistengana heltzea da erakusketaren xedea.
Erakusketan parte hartzeko bi modu zabaldu ditu Lekeitioko Udalak: Lekeitioko Kultur Etxean izena emanda edo kulturetxea@lekeitio.eus helbidera idatzita. Izena emateko orduan, artista bakoitzak bere lanen argazki eta dokumentazioa (biografia eta erakusketaren azalpenak) aurkeztu beharko ditu, eta behin aurkeztuta, udaleko kultur saila arduratuko da lanak ebaluatzeaz.
Lanak ebaluatu ostean, maiatzaren hasieran argitaratuko da onartu eta baztertuen zerrenda, eta gero, zozketa baten bitartez hautatuko dira behin betiko parte hartzaileak. “Lehentasuna izango dute Lekeitio eta eskualdeko artistek. %70 lekeitiarrak izango dira (lekeitiar moduan onartzeko izena ematearekin batera errolda agiria aurkeztu beharko da), %10 mankomunitatekoak eta %20 kanpotarrak”.
Parte hartzaileen zozketa egiteaz gain, artista bakoitzak erakusketa jarriko duen astea ere zozketatuko da, eta artista bik elkarren artean trukatu nahi baldin badute, beraien artean adostu beharko dute. “Horrelako kasuetan, kultura sailak ez du inolako erantzukizunik bereganatzen, artista bien artean egon litezkeen desadostasunen gainean”. Zozketa egin eta astebetera artistek ez badute ezer komunikatzen, kultura arloak artista guztiak ados daudela ulertuko duela jakinarazi du udalak.
Gainera, nahiz eta printzipioz erakusketak astebetekoak izango diren, iraunaldia aurkeztutako artista kopuruaren araberakoa izango da; partaide kopuruaren arabera bi astetara luzatu daiteke. “Artista bakoitzak 2 urtetik behin baino ez du parte hartuk erakusketa honetan. Gutxieneko hautagai kopurua aurkezten ez bada, aurreko urtekoek ere parte hartzeko aukera izango lukete, eta udala jarriko litzateke haiekin kontaktuan”. Erakusketari buruzko informazio gehiago eta oinarriak www.lekeitio.eus web orrian jarri dituzte eskuragarri.
