"Oso ondo" joan da 'Don't be dummy! Zuk ez duzu ordezkorik' ekitaldia
Ondarroako ikastetxeetako ikasleei bideratuta, 'Don't be Dummy! Zuk ez duzu ordezkorik' ekitaldia egon da gaur [martxoak 12], Ondarroako Kofradia Zaharrean.
Bide segurtasunean, gidatze arduratsuan eta zirkulazioko istripuen prebentzioan gazteak sentsibilizatzeko programa da Don’t be dummy! Zuk ez duzu ordezkorik. Ondarroako Kofradia Zaharrean egin dute gaur ekitaldia, Batxilergoko eta Lanbide Heziketako ikasleei zuzenduta, eta balorazio “oso ona” egin dute antolatzaileek.
“Bi saio egin ditugu eta oso ondo joan dira biak. Ikasleen partetik ere parte hartze aktiboa egon da”. Suhiltzailea, udaltzaingoa, eta trafiko istripua edukitako pertsona joan dira dira beraien testigantzak kontatzera, eta bakoitzak hartu beharreko ardura jarri dute mahaigainean. Gainera, Lea-Artibaiko lau pertsonek parte hartu dute gaurko ekitaldian; Ugaitz Alegriak ahotsa jarri dio protagonistari; Leire Bereikua errealizazioaz arduratu da; Berriatuan bizi den Landerrek suhiltzaile gisa hitz egin du; eta Ibon Oregi markina-xemeindarrak berak izandako trafiko istripuaren inguruan aritu da.
