Gabino Muruak udaberriko ortuaren inguruko ikastaroa emango du Lekeition
Lekitto Bedarra taldeak antolatuta, martxoaren 29an izango da ikastaroa, 09:30etik 12:30era. Ikastaroan parte hartzeko izena ematea beharrezkoa da; toki mugatuak daude.
Udaberriko ortuagaz lanean hasteko gogoz egongo dira zenbait. Aditu batekin batera bidea hasi nahi duenak, Lekeition izango du horretarako aukera. Izan ere, Lekitto Bedarra taldearen ekimenez, Udaberriko ortua: zer eta zelan ikastaroa emango dute martxoaren 29an. 09:30ean elkartuko dira parte hartzaileak Lekeitioko Azkue Ikastolan, eta 12:30ak arte iraungo du ikastaroak.
Gabino Murua adituaren eskutik jasoko dute ikastaroa. Udaberriko landaketak, hazitegia zelan egin, nola erein eta beste hamaika kontu ikasiko dituzte bertaratzen direnek. Eguraldia lagun izaten badute, praktikak egingo dituzte Usotegiko ortuan: bankalak zelan egin ikasteaz gain, patatak, tipulak eta letxugak erein eta landatuko dituzte. Era berean, tomate txertatuak negutegian ere ipiniko dituzte.
Ikastaroan parte hartzeko 10 euro ordaindu beharko dira, eta 605 77 54 45 telefonora deitu. Antolatzaileek jakitera eman dutenez, toki mugatuak egongo dira.
Iaz ere Murua izan zuten irakasle modura, eta “arrakasta handiz” osatu zuten ikastaroa. Hori horrela, aurtengoan martxoan, apirilean eta maiatzean ikastaro bereziak antolatuko dituzte Muruagaz.
