Markina-Xemeingo emakumeak saretzen hasteko 'Titu, ba!' prozesua ipini dute martxan
Herriko jardun feministaren inguruan hausnartzeko asmoz, Markina-Xemeingo Udalak eta herriko mugimendu feministako kideek galdetegi bat zabaldu dute herrian; martxoaren 31ra arte bete daiteke. Ostean, aurrez aurreko saioak egingo dituzte.
Herriko jardun feministaren inguruan hausnartu eta bide berri bat hasteko asmoz, Markina-Xemeingo Udalak eta herriko mugimendu feministako kideek prozesu bati ekin diete. Herrian feminismoaren inguruan “hutsune nabarmena” zegola oinarritzat hartuta, Titu, ba! izenburupean hasi dute prozesua; gaur gaurkoz, helburua Markina-Xemeingo emakumeak saretzen hasi eta herriko jardun feministaren inguruan duten iritzia jasotzea da.
Hala, galdetegi bat zabaldu berri dute herrian, eta martxoaren 31ra arte betetzeko aukera egongo da. Online nahiz aurrez aurre bete ahalko da galdetegia, hiru hizkuntzatan: euskaraz, gaztelaniaz eta arabieraz. Aurrez aurre bete nahi dutenek, udaletxeko harreran edo Herri Bibliotekan eskatu ahalko dute galdetegia; behin beteta, udaletxeko harreran ipini duten kaxan utzi beharko da galdetegia.
Mugimendura batu eta herriko emakumeak saretzen hasteko beharra azpimarratu dute: “Balio handia du beste emakume* batzuekin elkartu eta gure errealitateaz jardutea, gertatzen dena hobeto ulertu, partekatu eta eraldatzeko bideak hasten direlako orduan. Nola bizi duzu herriko emakumeok* saretzeko ez espaziorik ez dinamikarik izatea? Animatu galdetegia betetzera. Titu, ba!”.
