Neandertalek Euskal Herrian utzitako aztarnei buruz arituko dira Zientziaren Giltzaken hitzaldian
Asier Gomez Olivencia paleontologoak gidatuko du martitzeneko hitzaldia [martxoak 25]. Kofradia Zaharrean izango da, 18:30ean.
Neandertalak Euskal Herrian utzitako aztarnak hizpide, aurkikuntza eta ikerkuntza teknika berriei buruz arituko da Asier Gomez Olivencia (Barakaldo, 1979) paleontologoa martxoaren 25ean [martitzena] Ondarroan eskainiko duen hitzaldian. Hilero legez, Zientziaren Giltzak Elkarteak antolatutako hitzordua da honakoa, eta Kofradia Zaharrean egongo da, 18:30ean.
Indusketetan aurkitutako fosilen eta aztarnen azterketan jarriko du fokua Gomezek, “iragana ezagutu eta ulertzeko” bide bezala planteatuz. “Horrek ahalbidetzen digu orain dela milaka urte bizitza nolakoa zen ulertzea. Izan ere, azken urteetan egindako bilduma arkeo-paleontologikoen berrikuspenak Europako neandertalen portaera ulertzeko giltza izan dira”. Gomezek adierazi duenez, aztarnategi eta teknika berriek duela 430.000 urte agertu eta orain dela 40.000 desagertu zen giza leinu ospetsuen inguruko “informazio berri baliotsua” eskaintzen dute.
Hala, Euskal Herria ez dela salbuespena azpimarratu du paleontologoak; izan ere, 1967an Dimako Axlor aztarnategian agertu ziren hiru gisa fosilen aztarnek datu “interesgarriak” plazaratu zituela adierazi du: “Aurretik egindako identifikazio neandertalak bezala, ezbaian jartzen du”. Gomezek gaineratu du, Karrantzako Polvorin kobazuloko aztarnategian Euskal Herrian gaur egunera arte aurkitu den neandertalen fosilen kopururik “altuena” dagoela. “Fosil hauen erdia Bizkaiko Arkeologia museoan aurkitu ziren eta beste erdia 2021ean hasitako indusketetan. Bilduma zaharren berrikuspenak ahalbidetu du giza fosil garrantzitsuen identifikazioa eta hori indusketa berrian abiapuntua izan da”.
Gomez Giza Eboluzioan espezializatutako doktorea eta paleontologoa da Euskal Herriko Unibertsitatean. 100 artikulu zientifikotan parte hartu du, eta Atapuercako Ikerketa taldean egin zuen tesia. Atapuercan egin ditu zenbait indusketa, eta Euskadiko beste zenbat aztarnategitako lanak zuzendu ditu, besteak beste, Karrantzako Polvorin kobazuloko lehenengo Osineakoa. Izan ere, bertan, neandertal baten fosilak aurkitu dira. Horrez gain, Cambridgeko Unibertsitatean eta Parisko Musée de l’Hommen ere lan egin du.
