Muxutruk azoka antolatu du Txirrimorraskik
Asteburuan egongo dira Ondarroako Erakusketa Aretoan. Zapatuan [martxoak 22] 10:00etatik 14:00etara, eta 16:00etatik 20:00etara, eta domekan [martxoak 23] 10:00etatik 14:00etara.
Ondarroako Txirrimorraski taldeak Muxutruk azoka antolatu du astebururako, “gutxiago kontsumitu eta herritarren kontzientziak pizteko” helburuagaz. Hala, zapatuan [martxoak 22] eta domekan [martxoak 23] jarriko dute azoka herriko Erakusketa Aretoan; zapatuan, 10:00etatik 14:00etara eta 16:00etatik 20:00etara egongo dira, eta domekan, goizez bakarrik. “Erabiltzen ez dugun material asko daukagu gure bi lokaletan, eta azkenengo garbiketa egin genuenean tristea iruditu zitzaigun erabilpenik ematen ez genion materiala lokalean edukitzea. Beraz, ideia ona iruditu zitzaigun Muxutruk azoka antolatzea, materialari guk ematen ez diogun bigarren erabilpena emateko nahi duenak”.
Mota guztietako materiala egongo da azokan: “Jolasak, ipuinak, kartak, material didaktikoa, arropak… denetarik egongo da. Lokalean daukagun materiala eramateaz gain, norbanako gisa ere etxean daukaguna baina behar ez duguna ere eramango dugu. Hortaz, herritarrei ere dei egiten diegu erabiltzen ez dituzten gauzak azokara ekartzeko. Edonork parte hartu dezake azokan, herriari zabaltzea baita gure helburua. Gainera, xedea, ahal den eta azokarik osatuena egitea da; beraz, esku zabalik hartuko dugu datorren material guztia”. Taldeak jakinarazi du bihar [martxoak 21] arratsaldean azoka osatzeko materia biltzen egongo direla Erakusketa Aretoan, 17:00etatik 20:00etara. “Hala ere, asteburuan zehar ere eraman ahalko du bakoitzak nahi duena”.
Gaineratu dute, ez dela “beharrezkoa” materialaren trukea egitea, helburu nagusia bertan dagoenari “bigarren bizitza” ematea baita. “Zenbat eta jende gehiago etorri, hobeto! Lehenengo aldia da horrelako azoka bat antolatzen duguna, eta amaiera irekia dauka momentuz. Hau da, soberan gelditzen den materialarekin ez dakigu zer egingo dugun; izan ere, aukera desberdinak ditugu mahaigainean. Baina lehenengo asteburuko azoka zelan doan ikusi beharko dugu!”.
