Eguaztenean amaituko da Amorotoko garagardo ikastaroan izena emateko epea
Zapatuan [apirilak 5] egingo dute garagardoa eta apirilaren 26an sartuko dute botiletan.
Amorotoko garagardoa egiten ikasi nahi dutenek, zapatuan [apirilak 5] edukiko dute horretarako aukera. Amorotoko Kultur Taldeak eta Amorotoko Udalak elkarlanean antolatuta, garagardo hura eguten ikasteko behar diren osagai eta tresna guztiak ikusi eta erabiltzeko aukera egongo da.
Bi hitzordu edukiko ditu tailerrak, eta biak ere kultur etxeko goiko solairuan izango dira, 10:00etan. Zapatuan [apirilak 5] garagardoa egingo dute. Bost ordu inguruko saioa izango da, eta egiten den bitartean garagardo dastaketa eta pintxoak egongo dira. Apirilaren 26an, ostera, garagardoa botiletan sartuko dute, bi ordu inguruko saioan. Egiten duten garagardotik, parte hartzaile bakoitzak hiru botila eroan ahalko ditu; gainontzekoa, beste 180 botila, Garagardo Egunean egongo da eskuragarri.
Bihar [apirilak 2] da ikastaroan izena emateko azken eguna. Herriko Tabernan eman daiteke izena; ordainketa, ostera, (8 euro), egunean bertan egingo da.
