Gabino Muruaren ikastaroak 24 partaide elkartu ditu Lekeition
Lekitto Bedarra taldearen ekimenez, 'Udaberriko ortua: zer eta zelan' ikastaroan murgildu ziren partaideak. Lekeitiarrez gain, eskualdeko nahiz urrunagokoek ere parte hartu zuten ikastaroan.
Udaberria heltzeagaz batera, ortuan buru-belarri lanean hasi dira hainbat, eta horietako bat izan da Lekitto Bedarra taldea ere. Izan ere, joan den zapatuan [martxoak 29] Gabino Murua aditu gabiriarragaz batera Udaberriko ortua: zer eta zelan ikastaroan murgildu ziren.
Antolatzaileek azaldu dutenez, eskualdeko partaideez gain, urrunagokoak ere bertaratu ziren ikastarora: “Guztira 24 partaide izan ditugu. Lekeitio, Aulesti, Mendexa, Berriatua, Markina-Xemein, Ondarroa, Ugao Miraballes eta Eatik etorritakoak. Denak ere, adi egon dira Gabinoren azalpenei”. Gabinok hainbat atal sakonki azaltzeko tartea hartu zuen: “Garrantzia eman zion sasoiku eta bertoko landareak ekoizteari. Izurriteei produktu naturalekin modu egokian aurre egiteko hainbat aukera ere azaldu zituen”.
Usotegi herritarren ortuan letxugak eta tipula landatu eta patatak erein behar zituzten arren, eguraldiaren ondorioz ezin izan zuten egin. Hala ere, bankalak prestatu zituzten praktikarako, Usotegira joan ohi diren gazteen laguntzagaz: “Gazteak gogor aritu ziren lanean. Ongarria eroan eta lau bankal prestatu genituen”.
Usotegin bankalak prestatu zituzten gazteek.Lekitto Bedarra
Zapatuan ezin izan bazuten ere, atzo [martxoak 31] elkartu ziren berriro ere hainbat partaide, landaketak egin eta ikasitakoa praktikan ipintzeko asmoz. Hala, beste bost lagun bildu ziren atzo, eta denak ere, Muruaren ikastaroan parte hartutakoak izan ziren; landaketak egin ostean, dominikar mojei letxuga, azelga eta porruak eroatera joan ziren.
