'Karteletrak' erakusketaren irekiera ekitaldia "oso ondo" joan da
Erakusketa ikusgai egongo da Markina-Xemeingo karmeldarren aretoan apirilaren 11ra arte. Erakusketaren itxiera Mursego taldeak egingo du, kontzertu batekin.
Markos Gimenoren lana herritarrei hurbiltzeko asmoz, Karteletrak erakusketaren irekiera ekitaldi egin zuten zapatuan [martxoak 28] Markina-Xemeingo karmeldarren aretoan. Hala, arduradunek azaldu dutenez, “oso ondo” joan zen ekitaldia.
Eguna umeentzako Abere ba palindromo tailerragaz hasi zuten. Bigara kolektiboaren eskutik, 10 gaztetxo palindromoekin jolastu eta hausnartzen aritu ziren: “Oso ondo egon zen. Ordu eta erdi inguruko tailerra izan zen, oso entretenigarri eta aberasgarria”.
Arratsaldean, ostera, Gimenoren munduan sartu ziren bete-betean, eta Joseba Sarrionandiak eta Juanmi Bravok aurkeztu zuten Gimenoren lana. Sarrionandia izan da Gimenoren palindromoetan oinarritutako liburuaren egilea eta baita erakusketako hainbat kartelen egilea ere; hala, testuen inguruan hitz egin zuen idazleak. Bravo, ostera, Gimenoren laguna izandakoa da; esperientzia pertsonaletik eta bizipenetatik hitz egin zuten Bravok. Ekitaldiagaz amaitzeko, Sarrionandiak erakusketako 52 artelanetan zehar bisita gidatua egin zuen.
Erakusketa ikusteko gogoz geratu direnek apirilaren 11ra arte izango dute aukera. Eguen eta barikuetan 18:00etatik 22:00etara bitartean egongo da erakusketa ikusgai, zapatuetan, aldiz, 12:00etatik 14:00etara eta 18:00etatik 20:00etara, eta domeketan, 12:00etatik 14:00etara. Erakusketaren itxiera ekitaldia, ostera, Mursego taldeak egingo du, apirilaren 11n, 19:00etan.
