Mikel Arrasate Larrea, Euskadiko txapeldun 23 urtez azpikoetan
Atleta lekeitiarra Joanes Goitisolo Otazua garailearengandik hurbil iraun duen bakarra izan da, Oñatiko Duatloian. Bigarren postua lortu du maila absolutuan, eta bizkorrena izan da 23 urtez azpikoen sailkapenean, 01.52.52ko denboragaz.
Argazkia: Naike Ereñozaga Orue. Iragan zapatuan [martxoak 29], Oñatiko Duatloiak Euskadiko Txapelketa hartu zuen. Probak Alusigma Peñota Dental etxeko Joanes Goitisolo Otazuaren legea jarraitu zuen: lehen unetik merezimendu osoz nagusituz eta 01.50.39ko denboragaz lortu ahal izan zuen txapela gernika-lumotarrak. Amandarri Triatloi Klubeko Mikel Arrasate Larreak, bere aldetik, proba erregularra egin zuen, eta irabazlearengandik hurbilen ibili zen parte hartzaile bakarra izan zen, maila zein gogortasun handiko duatloian: lehenik eta behin, 10 kilometro egin behar izan zituzten lasterka; jarraian, 38,5 kilometro bizikletaz; azkenik, beste 5 kilometro korrika.
Arrasate, bigarren sektorean. Argazkia: Naike Ereñozaga Orue.
Lekeitiarrak 01.52.52an gelditu zuen erlojua, hiru trantsizioetan irabazlearengandik minutua pasatxora lehiatuz. Podiuma Goitisoloren taldekide Javier Fernandez Vicariok osatu zuen, baina ia lau minutu gehiago behar izan zituen lanak biribiltzeko: 01.56.28. Arrasatek, gainera, 23 urtez azpikoen lehia irabazi zuen. Garraitz Kirol Taldeko nahiz Koaxi Triatloi Taldeko atletak ere txukun aritu ziren: Garraitzeko Kepa Legarza Lopez 14. postuan sailkatu zen (02.00); gainera, V2M kategoriako denborarik onena berea izan zen. Koaxiko Larraitz Torrontegi Roo, ostera, zazpigarrena (02.34.41) izan zen emakumezkoen artean.
Taldekako sailkapenean, Amandarri zortzigarrena izan zen; Arrasate, Beñat Garcia de Andoin Laka eta Asier Marfil Morenoren denborak baliatu zituzten, 06.27.01eko kopuru totala osatzeko.
