Apirilaren bukaeratik aurrera Mutrikuko edukiontzi marroietan hondakin organikoak birziklatzeko txartela beharko da
Orain arteko txartelak baliogabetu egingo dira; beraz, herritarrek berria eskuratu edo 'Ireki' apikazioa erabili beharko dute. Txartel berriak eskuratzeko datak zehaztu ditu Mutrikuko Udalak.
Debabarreneko Mankomunitateak edukiontzi marroietan irekitze elektronikoaren sistema ezarriko du apirilaren bukaeratik aurrera. Hala, mutrikuarrek txartel elektronikoa edota telefono mugikorreko Ireki aplikazioa erabili beharko dute edukiontzi marroia zabaldu eta organikoa bertara botatzeko. “Gaur egun, Debabarreneko hondakinen gaikako bilketaren tasa %53,2ko da eta Ekonomia Zirkularrerako Hondakinen eta Lurzoru Legeak %55eko gutxienekoa ezartzen du 2025erako eta %60koa 2030erako”. Debabarrenako eskualdean datu horietara iristeko helburuarekin hartu dute edukiontzi marroiak ixteko erabakia.
Debabarreneko Mankomunitatetik mezu “argia” bidali die herritarrei: “Gogora dezagun hondakinak behar bezala bereiztea funtsezkoa dela, material bakoitza dagokion edukiontzian birziklatuz gero, horien berreskurapena erraztuko dugulako eta baliabideak berrerabiliko ditugulako”.
Beraz, apirilaren bukaeratik aurrera egungo txartelak baliogabetuko dira, eta herritarrek bi aukera izango dituzte txartel berria eskuratzeko: Batetik, organikoko poltsak lortzeko txartel zaharra erabiltzen dutenek etxean jasoko dute txartel berria, eta bestetik, etxean jasotzen ez dutenek herriko puntu zehatzetan jo beharko dute: “Apirilaren 8,9 eta 10ean Merkatu Plazan jaso ahalko dira txartelak, 10:00etatik 14:00etara eta 17:00etatik 20:00etara. Apirilaren 11n eta 12an Txurruka Plazan jaso beharko dira; lehenengo datan 10:00etatik 14:00etara eta 17:00etatik 20:00etara, eta bigarrenean, 10:00etatik 14:00etara”. Mutrikuko Udaletik jakinarazi dute txartela jaso ahal izateko Nortasun Agiria aurkeztu beharko dela, eta zehaztutako datak igaro ondoren, txartelak udaletxean jaso beharko direla. Txartela erabili nahi ez duenak mugikorreko aplikazioarekin ireki beharko du edukiontzia, Ireki aplikazioaren bidez QR kodea eskaneatuta.
Kanpaina. Debabarreneko Mankomunitateak Birziklatzea garbi jokatzea da. Erabili txartel marroia leloa duen kanpaina abiarazi berri du. Honetarako, eskualdeko erakunde eta kirolarien laguntza izango du, eta helburua, “joko garbia hondakinak bereizteko jardun egokiekin lotzea” izango da. “Hori erakusketako bihar kale ikuskizuna egingo dugu Txurruka Plazan, 17:00etatik 20:00etara”.
Herritarrei “aktiboki” parte hartzeko deia egin die Mankomunitatetik: “Guztion inplikazioa funtsezkoa da arrakasta lortzeko. Birziklapenaren aldeko konpromiso kolektiboak ingurune jasangarriago baterantz aurrera egiten lagunduko du”.
