Lai Koloreak azokak kultura ezberdinetako 150 ikasle inguru elkartu ditu
Lea Artibai Ikastetxeko ikastaroetako ikasleek parte hartu dute azokan. Bigarren eskuko azoka, jaki desberdinak eta kultura anitzetako erakustaldiak egon dira.
Markina-Xemeingo Lea Artibai Ikastetxeak Lai Koloreak azoka ospatu du gaur [apirilak 3], eta beste urte batez, “oso pozik” agertu dira egunarekin: “Eguraldiarengatik ezin izan dugu azoka zelaian egin, baina ikasleak oso eskertuta agertu dira egunarekin. Oso ondo joan da eta oso gustura aritu dira denak”.
Ikastaro ezberdinetako eta kultura anitzetako ikasleek guztira bederatzi postu ipini dituzte, bana ikastaro bakoitzeko. Kultura anitzen topagunea izan da Lea Artibai Ikastetxea: “Ekintza hau inklusiorako eta kultura ezberdinak bateratzeko da. Bakoitzak bere kultura harro erakusten du eta aldi berean besteena ikusi eta ikasteko eguna da”. Hala, munduko jaki ezberdinak dastatu eta Senegalgo kirolak eta Peruko dantzak ikusteko aukera egon da.
Lea Artibai Ikastetxetik egunaren balorazio ona egiteaz gain, datorren urtean ere antolatzeko asmoa erakutsi dute: “Hurrengo urtean jarraitzeko asmoa daukagu. Ikasleek asko eskertzen duten eguna da. Eskualdeko kultur aberastasuna ezagutzeko, ospatzeko eta gozatzeko urteroko hitzordu bihurtu da”.
