Joao Almeida: erakustaldia eta ordainsari bikoitza Zelaian
UAE taldeko portugaldarrak irabazi du Markina-Xemeinen amaitu den Itzuliaren gaurko [apirilak 10] laugarren etapa, eta Iider berria da. Eskualdeko ziklistak, Txomin Juaristi markina-xemeindarra eta Ander Okamika lekeitiarra, eguneko ihesaldian protagonista izan dira.
Joao Almeida Markina-Xemeingo helmugan Joao Almeidak mahai gainean kolpe handi eman du aurtengo Itzulia Basque Countryn. UAE Team Emirates-XRG etxeko portugaldarrak Beasain eta Markina-Xemein lotu zituen laugarren etapa eska zitekeen modurik distiratsuenean poltsikoratu du gaur [apirilak 10], eta hautagaien taldearekiko 28 segundoko errentagaz gurutzatu du Zelaiko helmuga lerroa. Uzta bikoitza batu du Almeidak: etapa garaipena ez ezik, liderraren elastikoa ostu dio Maximilian Schachmanni, eta 30 segundoko aldea lortu du alemaniarrarekiko.
Azterketa gogorrari aurre egin behar izan diote Euskal Herriko Itzuliaren laugarren jardunaldian: mendatez josiriko ibilbide latzari txirrindularien jarrera oldarkorra gehitu zaio. Ihesaldian sartzea ez da ogibide erraza izan, nazioarteko izar entzutetsuenetako asko lehia horretan ibili baitira. Gogotik kostatu da eguneko ihesaldia osatzea. Azkenean, bederatziko sendoa eratu da; tartean egon dira Sepp Kuss, Marc Soler, Mauro Schmid edota Ben Healy.Â
Etapa erdian, minutura iristen ez zen errenta apala izan dute iheslariek. Gontzugaraiganeko mendate pankarta harrapatu orduko, Lea-Artibaiko ordezkari biek, Euskaltel Euskadiko Txomin Juaristi markina-xemeindarrak eta Burgos BH-Burpellet etxeko Ander Okamika lekeitiarrak, erasora jo dute. Jaitsierako bihurgune nahiz txoko bakoitza inork baino hobeto ezagutzen zuten jakitun, Lekoitz-Ganeko maldetan aurreko taldearekiko aldea murriztu dute, eta Aulestin ailegatu dira lasterketa burura. Lehiakor agertu da eskualdeko bikotea, inoren aurrean kikildu barik, eta azken mendatearen magaileraino bultza egin dute.
IKUSI ARGAZKI GALERIA ZUZENEAN
Izuako aldapa beldurgarriei ekiteko puntuan zirela harrapatu dituzte aurrean zihoazen 11 erromesak. Bat-batean lasterketaren ekosistema errotik eraldatu da: sailkapen orokorreko oilarren sasoia hasi da. Bahrain Victorious etxeko Santiago Buitrago kolonbiarra izan da sagarrondoa astintzen lehena. Inongo arrakala barik erantzun dute Almeidak, XDS taldeko Astana etxeko Clément Champoussin frantziarrak, Red Bull-Bora Hansgroheko Florian Lipowitz alemaniarrak eta eguazteneko [apirilak 9] etapa irabazleak, Cofidiseko Alex Aranburu ezkiotarrak.
Txomin Juaristi: “Lekoitz-Ganen gora, hunkiduraren hunkiduraz, hankak igarri ere ez nituen egiten”
Maldarik pikoenekin batera, halera, indartsuenaren legea ezarri du Almeidak. Inor ez da gai izan bere erasoaldi basatiari aurpegia erakusteko. Ia minutu erdiko pitzadura zabaldua du atzeko taldetxoarekiko, Izuako mendate pankartatik pasatu denean. Jaitsieran, Aranburuk bere abilezia teknikoa baliatu du, aurrera egin guran. Nahi eta ezin. Almeidak goranzkoan erakutsitako indarra trebezia bihurtu da, errepideak behera egin duenean. Garaipena dastatzeko astiagaz helmugaratu da Zelaian bihartik aurrera lidergoa defendatu beharko duen portugaldarra. Podiumean, Jose Pablo Arriaga artista markina-xemeindarrak egindako garaikurra jaso du.
Etxekoaren irribarrea.
Bizikleta estreinakoz hartzen duen umearen irribarrea zerion etxeko helmugan etxeko txirrindulariari. Juaristik eguneko “emozio zurrunbiloa” azpimarratu du, Zelaiko lerroa igaro berritan: “Lekoitz-Ganen gora, hunkiduraren hunkiduraz, hankak igarri ere ez nituen egiten. Etxean lehiatzeak balio erantsia du, baina errepidea ezagutzearen karta baliatu ahal izatea ere badakar, batez ere, tankerako etapa gogor batean”.
Txomin Juaristi
Bere iheskide Okamika ere ibilbidearen gogortasunaz mintzatu da: “Ibilbide itogarri horregaz, ihesaldiak helmugara iristeko aukera zuela uste genuen, eta horrexegatik behar izan da hainbeste denbora hura egonkortzeko”. Juaristigaz atzetik aurrerako bidea egitea “plazer hutsa” izan dela aitortu du: “Aurrera iristean eta taldean zeintzuk zeuden ikustean, helmugarainoko bidea egiteko aukerak zeudela pentsatu dut”. Edozelan ere, tropel buruan taldeak antolatzean, ihesaldiaren balizko aukera oro zapuztu da. “Dena dela, sentsazio onekin ibili naiz. Lehen bi etapak ez zitzaizkidan ondo egokitzen, baina hala Markina-Xemeingoa, nola Gernika-Lumokoa begiz jota ditut”.Â
Ander Okamika: “Aurrera iristean eta taldean zeintzuk zeuden ikustean, helmugarainoko bidea egiteko aukerak zeudela pentsatu dut”
Festa hasi baino ez da egin.
Bihar [apirilak 11], Gernika-Lumora iritsiko da Euskal Herriko lasterketa handiena. Koloredun sugea 13:00etan hasiko da pedalei eragiten; helmugaratzea 17:17 eta 17:43 artean aurreikusi dute. Etapa sigisagatsua da Busturialdea zeharkatuko duena: lau mendate puntuagarri edukiko dituzte eguneko menuan, baina, punturik banatu ez arren, ibilbidea gogortuko duten beste hainbat aldapa topatuko dituzte; azkena Kanpantxutik Mendietarako koska da, Artekaleko helmugatik hiru kilometrotara.
Bai Okamikak, bai Juaristik argi dute biharko hautagaia zein den. “Sailkapen orokorraren lehiatik aterata, eta faboritoen zaintza zein presioa galduta, Pello Bilbao da hautagaia. Inork baino hobeto ezagutzen du ibilbidea, eta lehian ibiliko den zalantzarik ez dut”, azaldu du markina-xemeindarrak.Â
Pello Bilbao: “Hobetu guran nabil, ea bihar”
Okamikak ere, pareko iritzia plazaratu du: “Azken bi etapetan denbora galdu du Pellok, amaierak lasai hartu ditu; bigarren eguneko erorketak gorputza minberatuko zion arren, seguru nago Gernikako etaparako bala bat gordetzen aritu dela”. Bilbaok berak, helmugaratu bezain pronto, zirt-zart laburtu du lasterketak orain arte utzi diona: “Hobetu guran nabil, ea bihar”.
Zapatuan [apirilak 12], Itzulia Lea-Artibaira bueltatuko da, Eibarren hasi eta amaituko den etapan. Izua eta Trabakua tartean, Etxebarritik eta Markina-Xemeindik igaroko dira txirrindulariak, birritan.
