Hasi dute Bizkaiko trainerillen liga Lekeitiok eta Ondarroak
Isuntzak bigarren postua lortu du gizonezkoen nagusi eta gazte mailetan, eta Ondarroak lehenengoa, emakumezkoen gazte mailan eta bigarrena, nagusien mailan.
Bizkaiko trainerillek ekin diete aurtengo lehiari. Domekan [apirilak 27] Lekeitiok hartu zuen ligako lehenengo estropada, eta etxeko arraunlariek maila ona erakutsi zuten, gizonezkoen nagusi eta gazte mailetan bigarren postuak irabazita. Ondarrutarrak ere ez ziren atzean geratu, eta emakumezko nagusien mailan bigarren postua eta gazteetan garaipena lortu zituzten.
Gazteei dagokienez, gizonezkoetan garaipena eskuratzetik ia bi segundora baino ez ziren geratu lekeitiarrak. Zierbenak hamar segundo inguruko errentagaz hartu zituen ia ziaboga guztiak, baina amaierarako Isuntzak errenta laburtzea lortu zuen. Hala, Zierbenak 17.21,65eko denbora eginda amaitu zuen estropada, eta Isuntzak, ostera, 17.23,58ko denboragaz. Ondarrutarrek seigarren postua eskuratu zuten, 18.12,40ko denbora eginda.
Emakumezkoetan, ostera, Ondarroak Mundakaren aurretik amaitzea lortu zuen. Lehenengo ziabogatik nagusitu ziren ondarrutarrak, eta goren goreneko maila mantendu zuten estropada guztian zehar. Hala, 20.13,05eko denboragaz amaitu zuten estropada; Mundakak 22.03,71eko denbora egin zuen.
Nagusien mailan, aldiz, bigarren postuak eskuratu zituzten Ondarroak nahiz Isuntzak. Emakumeei dagokienez, Kaikuren (19.48,57) atzetik amaitu zuen Ondarroak (20.19,27); lehenengo ziabogan Kaikuk hamabi segundo inguruko errenta ateratzen zieten ondarrutarrei, eta bigarren eta hirugarren ziabogetan errenta handituz joan zen.
Gizonezkoetan etxekoek hiru talde aurkeztu zituzten, eta Ondarroak, bat. Hala, Bermeo B-ren atzetik geratu zen Isuntza C, hogei segundo eskasera. Lekeitiarrek lehenengo ziaboga zortzi segundoko aldeagaz hartu zuten arren, bigarren ziabogan errenta laburtzea lortu zuten, Bermeok baino lau segundo beranduago hartuta. Hala ere, hirugarren eta azken ziabogan Bermeok aurrea hartu zuen, eta hala, 15.37,95eko denbora eginda amaitu zuten. Lekeitiok, ostera, 15.57,84ko denbora egin zuen. Atzetik geratu ziren Zierbena B eta Arkote A, eta bosgarren postuan amaitu zuen Ondarroak, irabazlea baino minutu bat gehiago eginda (16.38,24). Bermeo A zazpigarren eta Isuntza A zortzigarren geratu ziren, eta Isuntza B, ostera, hamargarren.
Hurrengo jardunaldia. Ligari Lekeition hasiera emanda, beste sei estropada jokatuko dituzte arraunlariek. Hurrengoa eguenean [maiatzak 1] izango da, Mundakan, 16:00etan. Mundakakoaren ostean, maiatzaren 3 eta 4an Elantxobek hartuko du trainerilla liga, 16:00etan eta 10:30ean, hurrenez hurren. Liga amaiera eta Bizkaiko Txapelketara sailkatzeko azken estropada maiatzaren 10ean izango da, Ondarroan.Txapelketagaz amaitzeko, ostera, Bizkaiko Txapelketa lehiatuko dute arraunlariek, maiatzaren 11n, Ondarroan.
