Bizkaiko nagusien elkargunea izan da Markina-Xemein
Bizkaiko Nagusien Eguna ari dira ospatzen gaur [ekainak 8] Markina-Xemeinen. Erakundeetako ordezkariek zahartze aktiboan aurrerapausuak ematen jarraitzeko deia zabaldu dute. Eguna dantzaldiagaz amaituko dute.
Jai giroa izan da nagusi gaur [ekainak 7] Bizkaiko Nagusien Egunean. Markina-Xemeinek hartu du aurtengo jaia, eta nagusi ugari elkartu ditu herrian. Urteroko jaiari ekiteko gogoz agertu dira hainbat nagusi: “Jende asko elkartzen gara gaurko egunez, eta gogoz gaude. Beste herrietako nagusiak ezagutzeko egun ona izaten da”.
Eguna agintarien harreragaz hasi dute. Bertan izan dira Markina-Xemeingo Beti Jai Jubilatuen Elkarteko, Nagusiak Elkarteko, Markina-Xemeingo Udaleko eta Bizkaiko Foru Aldundiko ordezkariak. Nagusiak Elkarteko Jose Ramon Landaluze presidenteak hartu du hitza: “Eskerrak eman nahi dizkizuet etortzeko esfortzua egin duzuenoi, eta espero dugu denok egun handia pasatzea, egurald onarekin. Egun hau gure komunitatea ezagutzera emateko antolatzen dugu, jendeak ikus dezan gure artean dagoen aniztasuna, eta ezagutzeko, era berean, zenbat ekintza egiten ditugu”.
Mari Eli Ituarte Zarragoikoetxea udaleko eta Elixabete Etxanobe Bizkaiko Foru Aldundiko ordezkariek ere hartu dute hitza, eta ados agertu dira Landaluzegaz: “Plazera da hemen egotea, eta eskerrik asko denoi. Inbidia asko ematen didazue horren aktibo zaretelako, eta gure bidelagun izatea gura dugu”. Zahartze aktiboan aurrepausuak ematen jarraitzeko beharra azpimarratu dute hiru ordezkariek, eta horretan jarraitzeko gonbidapena luzatu diete.Â
Agintarien harreraren ostean, bisita gidatua egin dute herrian zehar. Ostean, bazkaritarako elkartu dira denak Plazabarripean, eta bazkalostean dantzaldia egingo dute.
