Minbizia duten adingabeei laguntzeko asmoz dator Ausarta Eguna Lekeitiora
Aspanovas elkarteak goiz guztiko egitaraua antolatu du zapaturako [ekainak 14], minbizia duten umeen alde: "Minbizia duten adingabeen familiekiko konpromisozko keinu kolektiboa da".
Joan den ekainaren 2an egin zuten egunaren aurkezpena, Lekeition.Lekeitioko Udala Festa solidarioan murgilduko dira zapatuan [ekainak 14] Lekeition. Aspanovas elkarteak Ausarta Eguna ospatuko du herrian, minbizia duten Bizkaiko adingabeei laguntzeko asmoz. Festa bakarrik ez, aldarrikatu, elkartasuna adierazi eta ume nahiz familiei laguntzeko eguna izango da zapatukoa.
Bi helburu argia ditu egitasmoak: herritarrak mobilizatzea minbizia duten ume eta nerabeen familiei laguntzeko eta Aspanovasi Ausartak Arreta Integraleko Espaziorako dirua biltzen laguntzea. Azken hori minbizia duten Bizkaiko adingabeen ongizate fisikoa eta emozionala bermatzea ahalbidetuko duen “funtsezko proiektua” da, “gaixotasunaren unerik gogorrenetan arreta integrala eskainiz”. Hala, bildutako guztia izango da espazio horretarako, “ezinbesteko lekua baita minbizia duten Bizkaiko ume eta nerabeen eta haien familien ongizate fisiko eta emozionala bermatzeko”.
Nabarmendu dute Ausarta Eguna “jaia baino askoz gehiago” dela: “Bizkaiko minbizia duten adingabeen familiekiko konpromisozko keinu kolektiboa da. Ikasteko, partekatzeko eta Bizkaiko familia askoren bizitza aldatuko duen proiektu baten eraikuntzan laguntzeko aukera paregabea da. Izan ere, elkarrekin egiten dugun urrats bakoitzak gehiago hurbiltzen die ongizatea eta zaintza integrala gehien behar dutenei”.
Hala, denetariko ekintzak edukiko dituzte familien goiz guztian; musika, ikuskizunak, puzgarriak eta jolasak ez dira faltako. Bazkaritarako, ostera, La Salve, La Gilda del Norte eta Balmasedako Putxeren Kofradiaren lankidetzari esker, bazkari solidarioagaz gozatu ahal izango dute. Aspanovasek “biziki” eskertu nahi izan du Lekeitioko Udalaren eta BFAren babesa, eta baita Biobizz Foundation, Maier eta Cikautxo enpresen inplikazioa ere. Ildo beretik, “esker on berezia” eman diete Lekeitioko eskola, ikastetxe, denda, elkarte eta boluntarioei: “Hilabeteak daramatzate energia iraultzen egun handi honetarako”.
Ohorea. Lekeitioko Udalak adierazi du “ohore bat” dela eurentzat Aspanovas elkarteak Lekeition antolatzea Ausarta Eguna: “Umeen zaintza lehentasuna da udalarentzat eta egure babes eta laguntza osoa Lekeition eta Euskal Herrian minbizia duten umeentzat”. Zapatuan herriko plazara bertaratzeko deia egin diete herritarrei.
Egitaraua.
- 11:00. Ausarta sariak eta Txintxeta, Klipa eta Txorroskilo pailazoen ikuskizuna.
- 12:00. Oier Magoa.
- 12:30. Txirrist Txaranga.
- 12:30-15:30. Puzgarriak, jolasak eta umeentzako tailerrak.
- 13:30. Kontzertua: Unai Egia eta Saji.
- 14:30-15:30. Bazkaria.
- Goiz osoan. Musika, txosna eta Aspanovasen informazio gunea.
