Herri biren arteko urteroko zubia
Ondarroako Galiziar Etxeak Galiziako Letren Eguna eta Karmen jaiak antolatu ditu, barikutik [ekainak 13] domekara [ekainak 15] bitartean. Folklorez, gastronomiaz, musikaz eta omenaldiz jositako asteburua dute aurretik ondarrutarrek.
Ondarroako Galiziar Etxeak, Ondarroako Udalaren, Eikaren eta Galiziako Xuntaren laguntzaz, urteroko-urteroko ohiturari eutsiko dio asteburu honetan, eta Galiziako Letren Eguna nahiz Karmen jaiak ospatuko ditu, Ondarroan. Galiziar eta euskaldun herrien arteko “konexiorako asteburua” izango dela nabarmendu dute antolatzaileek, eta ekimenez beteriko egitarau oparoa aurkeztu. Barikutik [ekainak 13] domekara [ekainak 15] bitartean, herriko kaleak denetariko jarduerez beteko dira; Itxas Aurre plaza izango da ospakizunaren kokagune nagusia.
Galiziar Etxeko antolakuntza taldetik azaldu dute duela zenbait urtetatik uztailetik ekainera dataz aldatu dutela jaia: “Parte hartzen duten eragile eta taldeen arabera moldatzen ditugu datak, denek esku hartzea bermatuta egon dadin”. Os Novos Mariñeiros gaiteru taldea izango da asteburuko protagonista handietako bat; Galiziar Etxeko musikari taldeak zabalduko du barikuko egitaraua, eta hala zapatuan, nola domekan ere emanaldiak edukiko dituzte. Halaber, Itxas Aurren galiziar gastronomiaren izar diren produktuen azokagunea egongo da bihar, 12:00etan hasita eta egun osoan.
Halaber, antolatzaileek azpimarratu dute egitarauean tokiko eragileek parte hartzea “nahitaezkoa” dela: “Hemen bizi diren galiziarrentzat, oso garrantzitsua da bertoko herritarrek ere modu aktiboan parte hartzea. Aurten, Txirrimorraskik haurrentzako jolasak prestatuko ditu, eta Zerutxu talde markina-xemeindarrak euskal dantzen ikuskizuna emango du”. Hain zuzen, nabarmendu dute bai ondarrutarrek, bai eskualdeko herritarrek “begi onez” ikusten dutela jaialdia, eta urtero “bere pentsuan” egon ohi direla: “Antolatzaileoi sarri galdetzen digute urte bakoitzeko egitarauaren nondik norakoak zelakoak izango ote diren; horrek erakusten du ekimena zeharo errotuta dagoela eskualdean, eta herritarrentzako preziatua dela”.
Zapatuan, Galiziar Letren Egunean, ekitaldi nagusietako bat egingo dute: Real Academia Gallegak egun berezi horretan omentzen eta saritzen duen eragileari harrera egingo diote. Aurten, musika eta poesia herrikoiaren transmisioan eragin duten emakumeak omenduko dituzte, besteak beste, Adolfina eta Rosa Casás, Eva Castiñeira, Prudencia eta Asunción Garrido eta Manuela Lema. 12:30ean egingo dute omenaldi agerraldia, eta bertan egongo dira “agintari, ordezkari nahiz gonbidatuak”. Ostean, jaiari berrekingo diote, besteren artean, bermut saioagaz eta zuzeneko musikagaz; 23:30ean, gainera, Gran Queimadaren errezetaz gozatuko dute.
Karmenak ospatuko dituzte domekan. Gaita soinuz eta dantza betean ekingo diote egunari, Os Jarteiriños Nosa Xente talde sestaotarragaz. Jarraian, Itxas Aurrera eta Alamedara lekualdatuko da jaia. Voces Navarras taldeak bermuterako tartea girotuko du, eta Sestaoko Galiziako Seme-Alaben Elkarteak ere parte hartuko du: “Guretzat hori benetan esanguratsua da, kulturartekotasuna eta hibridazioa sustatzen dituelako; Ondarroako Galiziar Etxea Euskal Herriko Galiziar Etxeen sarearen barruan dago, eta bere funts nagusia da galiziar eta euskal kulturen arteko zubi lana bultzatzea”.
EGITARAUA
Ekainak 13, barikua.
-
12:00: Ekintza kulturalei hasiera emango zaie Os Novos Mariñeiros Ondarroako Galizia Etxeko gaiteru taldeagaz, Itxas Aurre plazan. Galiziako gastronomia eskaintzaren salmenta, Itxas Aurre plazan, egun osoan zehar.
-
13:00: DJ Zirkin.
- 18:00: Haurrentzako jolasak, Txirrimorraskirekin.
-
20:30-02:00: DJ Zirkin eta Xaibor.
Ekainak 14, zapatua.
-
11:00: Ekintza kulturalen hasiera eta galiziako produktu gastronomikoen salmenta, Os Novos Mariñeiros taldearen emanaldiagaz, Itxas Aurren.
-
12:00: Galiziako Letren Eguneko omenduei aipamen ekitaldia: Adolfina eta Rosa Casás, Eva Castiñeira, Prudencia eta Asunción Garrido eta Manuela Lema.
-
12:30: Gonbidatu eta agintariei harrera.
-
12:30: Zerutxu dantza taldearen emanaldia.
-
13:30: Bermut saioa Itxas Aurre plazan, Joxparen emanaldiagaz.
-
20:30-03:00: Joxpa eta Xaiborren emanaldiak.
-
23:30: Gran Queimada.
Ekainak 15, domeka.
-
11:00: Kalejira Os Jarteiriños Nose Xente gaiteru eta dantz taldeagaz.
-
12:00: Ekitaldi kulturalen hasiera, galiziar gastronomiako produktuen salmentagaz, Itxas Aurre plazan.
-
12:00: Meza santua eta prozesioa Karmengo Amaren omenez, Os Novos Mariñeiros taldeak lagunduta.
- Jarraian: Os Jarteiriños Nose Xente taldearen emanaldia Alamedan; ondoren, prozesioak badiara joko du.
-
14:00: Bermut saioa, Voces Navarras taldeagaz.
