Batzuk ozta-ozta, besteak nahieran
Johan Sorozabalek eta Jon 'Bullet' Zabalak doi-doi irabazi dute Markina-Xemeingo Grand Slamaren lehen partidua, Ekaitz Mendizabal 'Goixerri'-ren eta Mikel Mantzisidorren aurka. Aritz Erkiaga eta Ion Ibarluzea, ostera, nagusitasunez gailendu dira, Ludovic Ladutxeren eta Unai Lekerikaren kontrakoan.
Argazkia: Eraman Jai Alai. Goi-goitik hasi zuten, iragan barikuan [ekainak13], denboraldiko laugarren Gran Slama: Markina-Xemeingoa. Uni pilotalekuko harmailak bete zituzten ikusleen aurrean, lehendabiziko jardunaldiak bestelako partidu bi eduki zituen. Lehenak borroka estua eta latza izan zuen protagonista; bigarrenak, ostera, patroi jakin bat jarraitu zuena.
Lehen partiduan, Johan Sorozabal miarriztarrak eta Jon Bullet Zabala markina-xemeindarrak Ekaitz Mendizabal Goixerri eta Mikel Mantzisidor mutrikuarrak eduki zituzten aurrez aurre. Lea-Artibaiko bikote marroiak bete-betean ekin zion lehiari, 4 eta 0 aurreratuz; Mutrikukoei, aldiz, gehiago kostatu zitzaien neurketari neurria hartzea. Lehen seteko ezusteko lapurtarrak jasandako istripua izan zen: Sorozabalek, sake erresto batean, pilotakada gogorra jaso zuen belaunean. Minberatuta atera zen kantxatik, baina lortu zuen egoera iraultzea eta partidua maila lehiakorrean amaitzea. Bosna, seina eta zazpina berdinduta joan ondoren, Sorozabalek eta Zabalak errenta aipagarriarekin biribildu zituzten lanak: 15 eta 9, bikote marroiaren alde.
Argazkia: Eraman Jai Alai.
Bigarren setean, baina, mutrikuarrak gehiago izan ziren. Barruan nahiz horma bitara tanto ederrak egin zituen Goixerrik, baina ez zuen merezi besteko alderik egin markagailuan. Beren defentsa lanak zortzina, bederatzina edota hamarna berdintzea ahalbidetu zien marroiei, baina egiteko latza zuten, egoera beren alde jarri gura baldin bazuten. Bigarren setaren azken txanpan iritsi zen lehiarik estuena: piloteo luzeko tantoak izan ziren, oso borrokatuak eta berdinduak. Ikusleen berotasunarekin eta giro apartean egon zen Uni frontoiarekin, Goixerrik eta Mantzisidorrek 12 eta 15 irabazi zuten seta.
Berdinketa hausteko hirugarren seta bigarrenaren antzez hasi zuten. 1 eta 3koarekin, bazirudien partidua mutrikuarren esku zela, baina Zabalaren ekinak, Sorozabalen erabakigarritasunarekin uztartuta, launa berdintzera eroan zituen. Azken tantoan kale edo bale eginda, etxeko puntista eta miarriztarra gailendu ziren. Goixerrik Sorozabalen sakeari airez erantzun zion, baina pilota txapa azpira bidali zuen. Garaipenak emandako hiru puntuak poltsikoratuta, Sorozabalek eta Zabalak finalerdiak dituzte ortzimugan; horretarako, datorren astean Alex Goitiaren eta Imanol Lopezen kontrakoa irabazi beharko dute. Goixerrik eta Mantzisidorrek, beren aldetik, set bat irabazi izanaren puntutxoa jaso zuten barikuan, eta tantoen bataz besteko onarekin.
Jon Zabala: “Tarte batzuetan ihes egin digute, baina asmatu dugu distantziak neurtzen eta egoerari buelta ematen”
Zabalak, kantxatik atera berritan, Goixerriren “zenbait akats aprobetxatu” zituela adierazi zuen: “Tarte batzuetan ihes egin digute, baina asmatu dugu distantziak neurtzen eta egoerari buelta ematen; hori bai, kostatu zaigu garaipena lortzea”. Bere bikotekide Sorozabalek Uniko kantxaren xehetasunak nabarmendu ditu: “Abiadura handiko agertokia izanik, erreboteak min esanguratsua egin dezake. Errematatzeko aukerak egokitu zaizkidanean, ez du zalantzarik egin”.
Faborito handiak.
Bigarren partiduan, ez zen sorpresetarako inongo zirrikiturik egon. Aritz Erkiaga ispastertarrak eta Ion Ibarluzea markina-xemeindarrak nagusitasunez ezarri zuten beren legea, Ludovic Ladutxe getariarraren eta Unai Lekerika gernika-lumotarraren aurka. Erkiagak erremate itxurako hainbat maisulan margotu zituen kantxako mihisean, eta Ibarluzeak atzealdeko koadroak dominatu zituen. Ladutxek, ordea, ez zuen batere eroso jokatu; nahi eta ezin ibili zen lapurtarra, baita Lekerika bera ere. Ondorioz, 2 eta 0 gailendu ziren Lea-Artibaikoak: 15 eta 11, lehen setean; 15 eta 7, bigarrenean.
“Tarte batzuetan ihes egin digute, baina asmatu dugu distantziak neurtzen eta egoerari buelta ematen
Ibarluzeak azaldu zuen beren estrategia “ezin hobeto” atera zela: hutsik ez egitea. “Akatsak ekiditeko asmoz atera gara, eta hasieratik eroso mugitzea lortu dugu; neurri batean, beraiek beste batzuetan baino hutsegite gehiago eduki dituztelako gertatu da hori”, argitu du. Erkiaga Ladutxeren “egun txarraz” mintzatu zen: “Bere egun eskasa aprobetxatu dugu, ahalik eta alderik erosoena eskurateko. Urrats handia egin dugu txapelketan aurrera egite aldera, baina ezin ditugu Urreisti eta Basque moduko puntista garrantzitsuak ahaztu”.
Aritz Erkiaga: “Urrats handia egin dugu txapelketan aurrera egite aldera, baina ezin ditugu Urreisti eta Basque moduko puntista garrantzitsuak ahaztu”
Gaur-gaurkoz, Erkiaga eta Ibarluzea dira txapelketa patrikaratzeko hautagai nagusiak. Ladutxek eta Lekerikak, berriz, hil ala biziko partidua irabazi beharko dute Eñaut Urreisti mutrikuarraren eta Thibault Basque bidartarraren aurka. Gainera, ispastertarrak eta markina-xemeindarrak ere Urreisti eta Basqueren aurkako datorren asteko partidua irabaztea beharko dute Ladutxek eta Lekerikak. Hala, besteen emaitzen menpe daude.
