Isuntza, zortzigarren postuan itzulerako Kontxaren lehen jardunaldian
'Lekittarra'-k 19.42,86ko denbora lortu du Kontxako Banderaren lehen jardunaldian. Uretan, Orio nagusitu da; epaileek mirotzei ezarritako hiru segundoko zigorrak, baina, Zierbena ipini du aurretik, 10 ehunenengatik.
Argazkia: Bermeo Arraun Argazkiak. Lehia estutik ez ezik, polemikatik asko eduki zuen domekan [irailak 7] 130. Kontxako Banderaren lehen jardunaldiko estropadak. Orio izan zen uretan bizkorrena, baina ez, ostera, sailkapenean. Izan ere, arraunka hasteko unea orduko, epaileek hiru segundoko denbora zigorra jasoko zutela jakinarazi zieten oriotarrei, klubaren zodiaka, araudia urratuz, zero kalean zegoela eta. Penalizazio haren menpe egon zen, gerora, estropadaren emaitza. Orio guztietatik azkarrena izan zen (18.59,36), baina Zierbenak jaso zuen, aipatutako hiru segundoei esker, lehen postua, 10 ehunen bizkorragoko erregistroarekin (18.59,26). Bermeo-Urdaibaik, bere aldetik, lehia erregularra (19.05,44) egin zuen, eta urteko banderarik entzutetsuena poltsikoratzeko aukerekin jarraitzen dute bermeotarrek.
Banderaren sailkapen estropadan baino itsas baldintza samurragoak topatuagatik ere, lehendabiziko jardunaldia teknikoa, taktikoa eta gogorra izan zen parte hartzaile guztientzat; marearen eragina giltzarri izan zen, eta itzuliko luzean ezustekoak nahiz denbora hondoratzeak egon ziren, baita gogoratzeko moduko denbora bikainak ere. Bermeo-Urdaibai, Orio, Zierbena eta Getaria aritu ziren lehen txandan. Oriotarrek, tentsioari eta zigorraren jakinarazpenak suposatzen duen karga mentalari aurre eginez, beraien legea ezarri zuten lehenengo arraunkadarik; Zierbenak, edozelan ere, ondo eutsi zien gipuzkoarren ekinari, ziabogarainoko tarte hartan.
Itzuliko lanetan, kontrara jotzen zien hego-mendebaleko haizearekin, Oriok koska bat goratu zuen erritmoa, eta mirotzek poparean ezarritako langa hari eusteko gai izan zen bakarra Zierbena izan zen. Bermeotarrek ere, bigarren luzean maila handiagoa bistaratu eta erregistro hobea erdietsi zuten, baina ez zen nahikoa izan lehen bien mailara heltzeko. Helmugan, sei segundoko arrakala baino ez zuten lortu estropada buruko bi klubek eta, horrenbestez, Bermeo-Urdaibaik bigarren jardunaldiari begira aukerekin dirau. Getariari dagokionez, ahazteko moduko bigarren luzea egin zuen, eta hogei segundotik gorako denbora baliotsua galdu.
Isuntza, 26 urteren ondoren, Kontxara itzuli zen, eta bigarren txandako estropadan parte hartu zuen, San Juan, Hondarribia eta Donostiarrarekin batera. Hain zuzen, etxeko taldea izan zen probarik erregularrena eta bizkorrena (19.15,06) egin zuena. Donostiarrak lehen txandako Getariaren denbora hobetu zuen eta, hala, bigarren jardunaldia Orio, Zierbena eta Bermeo-Urdaibairekin lehiatuko du. Lekittarra-k, aldiz, urrunetik ikusi behar izan zituen denborarik onenak, eta bigarren txandako laugarren postuan (19.42,86) biribildu zituen lanak. Lekeitiarrek galtzeko ezer barik helduko diote 1999az geroztik lehiatu ez duten Kontxako Banderari, beraz.
Iñigo Larrinaga: “Ondo genekien bai Orio, bai Zierbena goiko kotan ibiliko zirela, baina, sei segundoko alde horrekin, estropada irabazteko asmoz uretaratzeko aukerekin gaude oraindik”
Proba amaitu berritan, Bou Bizkaia-ko patroia, Iñigo Larrinaga ondarrutarra, egindako lanarekin “gustura” agertu zen, eta azpimarratu zuen lehen jardunaldiko jomuga nagusia bete egin zutela: bizirautea. “Ondo genekien bai Orio, bai Zierbena goiko kotan ibiliko zirela, baina, sei segundoko alde horrekin, estropada irabazteko asmoz uretaratzeko aukerekin gaude oraindik. Abantaila horri buelta emateko, geure indarguneetan sinistu behar dugu; geure mailarik onena plazaratzea lortzen baldin badugu, badakigu onenengandik hurre ariko eta bandera eskuratzeko moduan izango garela”.
Zigor “onartezina”.
Iker Zabala bermeotarra, Orioko entrenatzailea, oso haserre agertu zen, epaileen zigor erabakia tarteko. Penalizazioa “onartezina eta lotsagarria” dela adierazita, argitu zuen taldearen zodiaka zegoen ingurutik lehen kalera “200 metrotik gorako tartea” zegoela, eta epaileen partzialtasunarentzako berbak ere izan zituen ahotan: “Jendea beraien ontzietan edonon eta edozelan ikusten dugu, baina, era berean, gu mugitu ere ezin gara egin; gaur ikusitako ikuskizuna penagarria izan da, eta hankasartze horrek aho zapore garratza uzten digu, arraunlariek egin duten estropada aparta zelan edo halan alboratu egin duena”.
Iker Zabala: “Jendea beraien ontzietan edonon eta edozelan ikusten dugu, baina, era berean, gu mugitu ere ezin gara egin”
Hurrengo domekari begira, “ezpata goian” uretaratuko direla nabarmendu zuen: “Eskifaiak aurretiaz zehazturiko plana bikain bete du lehen jardunaldian, eta seguru nago bigarrenean ere halaxe egingo duela; hala Kontxan, nola denboraldi osoan Orio uretan indartsuena izan dela frogatzeko asmoz aterako gara domekan. Zierbenak eta gainontzekoek gauzak oso gaitz ipiniko dizkigute, baina, aste honetan egingo dugun beharrari esker, uste dut geure trainerua are azkarrago ibiliko dela”.
Gorka Aranberri: “Kontziente ginen itzuliko luzea gako izango zela, eta tarte horretan egin dugun denbora erregistroa horren isla da”
Gorka Aranberri Orioko patroia ere pareko moldez mintzatu zen: “Beroketa saioan geundenetik, Ikerrek eta biok bagenuen zigorraren berri, baina arraunlariei hasiera hartu baino minutua lehenago jakinaraztea ez da bidezkoa, horrek kontzentrazioa galtzea baitakar; edozelan ere, penalizazioa onartzea besterik ez zaigu tokatzen. Uretan, kontziente ginen itzuliko luzea gako izango zela, eta tarte horretan egin dugun denbora erregistroa horren isla da. Saiatu gara askorik ez desbideratzen eta gure noranzkoari eusten, eta esango nuke estropada bikaina egin dugula. Bigarren jardunaldian gailentzeko aukerak bere horretan ditugu, eta dena emateko asmoz abiatuko gara”.
Arraun Lagunak, nahieran.
Emakumekoen lehian, Kontxako Banderaren azken bi ekitaldietako garaile Arraun Lagunakek, erakustaldia eman zuen, eta aurten ere Donostian gailentzeko urrats garrantzitsua egin; 10.29,20ko denbora apartarekin gailendu ziren, Euskotren Ligan bezalaxe, lehen unetik sendo agertuz. Lehendabiziko arraunkadetatik hasita, minutu biko tartean sei segundoko aldea urratu zuten gipuzkoarrek Tolosaldea eta Oriorekiko, eta aldeak handitu besterik ez zituzten egin itzulerako lanetan. Hortaz, Arraun Lagunakek zelanbaiteko lasaitasunez heldu ahalko dio bigarren jardunaldiari.
GIZONEZKOEN SAILKAPENA
- Zierbena: 18.59,26
- Orio: 19,59,36 (+0,10)
- Bermeo-Urdaibai: 19.05,44 (+6,18)
- Donostiarra: 19.15,06 (+15,80)
- Getaria: 19.20,12 (+20.86)
- Hondarribia: 19.21,86 (+22,60)
- San Juan: 19.34,72 (35,46)
- Lekittarra: 19.42,86 (43,60)
EMAKUMEZKOEN SAILKAPENA
- Arraun Lagunak: 10.29,20
- Tolosaldea: 10.39,20 (+10)
- Orio: 10.40,04 (+10,84)
- Zumaia: 10.45,10 (+15,90)
- Astillero: 10.53,88 (+24,68)
- Donostiarra: 10.54,32 (+25,12)
- Hibaika: 10.57,14 (+27,84)
- Hondarribia: 10.58,88 (+29,68)
