Euskal Federazioagaz zilarrezko domina eskuratu dute
Jaitz Lersundi eta Luana Burgoa amazona ondarrutarrek Cadizen jokatu den Espainiako gazteen zaldi jauzi txapelketan parte hartu dute lehenengoz, Euskal Federazioko ordezkari modura.
Euskal Federazioko taldekideak.Euskal Federazioa Ondarroako bi amazona gaztek, Jaitz Lersundi Etxaburuk eta Luana Burgoa Arrizabalagak, “lan bikaina” egin dute Montenmedion (Vejer de la Frontera, Cadiz) jokatu berri den Espainiako gazteen zaldi jauzi txapelketan. Euskal Federazioko ordezkari gira parte hartu dute, eta taldeka zilarrezko domina eskuratuta itzuli dira etxera.
Lersundi eta Burgoa zortzi urterekin hasi ziren zaldi jauzien munduan, eta urteotan Euskal Federazioak antolatutako hasierako mailako Liga Trankon lehiaketan aritu dira, bakoitza bere taldearekin. 2024. urtetik, biak Lezamako Aretxalde taldean dabiltza, Pello Elordui eta Antonio Gil entrenatzaileen gidaritzapean, eta lehenengoz parte hartu dute Espainiako Txapelketan: Lersundik Disablue des Baleines zaldiagaz lehiatu du kimu mailan, eta Burgoak Ustinov de Breka zaldiagaz, umeen mailan.
Luana Burgoa, bere zaldiagaz.
Lau eguneko lehiaketa tekniko eta zorrotzean, bi amazonek “maila handia” erakutsi dute: “Lau egunetan egin behar izan dituzten frogak teknikoki gogorrak izan diren arren, bakoitzak bere mailan zilarrezko domina lortu dute Euskal Federazioko taldekako lasterketan. Bakarkako lanean, aldiz, lan gogorraren ostean biek lortu zuten finalean sartzea, eta Jaitz podiuma zapaltzeko oso gertu egon bazen ere, laugarren postuarekin konformatu behar izan zen”.
Hala, lehiaketako esperientzia “oso aberasgarria” izan den aren, aitortu dute “tentsio handia” ere bizi behar izan dutela; hala ere, Ondarroako amazona biak “oso pozik” itzuli dira egindako lanarekin.
Jaitz Lersundi, bere zaldiagaz.
