Urriaren 18an egingo dute Aulestiko Ermitarik Ermita XVIII. mendi martxa
10 kilometroko ibilbide laburra eta 25 kilometroko ibilbide luzea egongo dira aukeran. Izen ematea zabalik dago.
Aulestiko Ermitarik Ermita mendi martxaren XVIII. edizioa datorren urriaren 18an ospatuko da, ohiko giro herrikoian eta bi ibilbide aukerarekin.
Parte hartu nahi dutenek izena emateko aukera martxa egunera arte edukiko duten arren, urriaren 13a orduko izena ematen dutenek oparia ziurtatuta jasoko dute. Hala, urriaren 13a bitarte 94-627 90 06 telefonora deituz edo administraria@aulesti.eus helbidera idatziz eman daiteke izena, eta baita sare sozialetan zabaldu duten estekaren bidez ere. 14 urtera artekoek 10 euro ordaindu beharko dituzte, 15 urtetik gorakoek, aldiz, 18 euro. Martxaren egun berean izena ematen duten 14 urtez azpikoek, ostera, 12 euro ordaindu beharko dituzte, eta hortik gorakoek, 20 euro.
Ibilbideei dagokienez, ibilbide luzeak 25 kilometro edukiko ditu, eta laburrak, 10 kilometro. Luzea 08:00etan abiatuko da plazatk, eta bost ordu eta erdi inguruko itzulia izango da: Aulestiko plaza, San Anton, Goierri, Urregarai, Malats, Zubero, Urriola, Murelaga, Garatxaga, Lekerika, Ilunzar eta Narea zeharkatuko ditu, berriro ere plazan amaitzeko. Motza, ostera, parketik hasiko da, eta Madalena, Murelaga, Garatxaga, Lekerika eta Narea zeharkatuko ditu, plazan amaitu aurretik.
Antolatzaileek jakinarazi dute ibilbidean zehar janaria eta edaria eskainiko direla. Era berean, gogorarazi dute txakurrik ezin dela eroan eta mendiko material egokia erabiltzea gomendatzen dutela. Gaineratu dutenez, mendiko makila emango diete partaideei, eta kopaua egingo dute herriko plazan 12:30etik 15:00etara; kopaurako martxako eskumuturrekoa aurkeztu beharko da. Gosaltzeko tabernak zabalik, aparkalekuak zehaztuta eta dutxak egongo direla jakinarazi dute.
