Toki berbera, bestelako egoera: V. Eusko Label Winter Series aurkeztu dute
2025/2026 Eusko Label Winter Series txapelketa aurkeztu dute. Hilaren 27tik otsailaren 15era jokatuko dute bosgarren aldia, Imanol Lopezen azkena. Aritz Erkiagak eta Ion Ibarluzeak hirugarren txapela erreskadan irabazteagatik borrokatuko dute. Ekaitz Mendizabal 'Goixerri'-k debuta egingo du lehiaketan.
Ver esta publicación en Instagram
Politak dira itzulerak. Polita, atzera begiratzea. Polita, gogoratzea. Duela bost urte “dena hasi zen tokira” bueltatuta, Lagako hareatzan aurkeztu dute 2025/2026ko Eusko Label Winter Series. Bost urtetan hazi eta hazi egin da txapelketa, Euskal Herriko zesta-puntaren erreferentzia izatera ailegatu arte, eta, hain zuzen, lehen aldia aurkeztu zuten toki berberean plazaratu dute gaur [urriak 14] bosgarrena izango dena. Asko izango du berezitik, asko ahaztezinetik, eta, zelan ez, Busturialdeko, Lea-Artibaiko nahiz Mutrikuko ordezkaritza zabala egongo da Jai Alaiko kantxan.
Azken urteotan txapelketa hasteko “ezinbesteko hitzordua” dela probestuta, hurrengo ekitaldia ere Urriko Azken Astelehenean abiatuko dute, hilaren 27an. Atzo [urriak 13] Xabier Barandikak eta Unai Lekerikak irabazitako Durangoko Master Seriesaren ondoren, Jai Alai Ligaren bigarren lehia izango da zesta-puntaren katedralak hartuko duena. Hamazazpi geltoki edukiko ditu bidaiak: hamar ligaxka jardunaldi, sei jardunaldiz osaturiko finalaurrekoen ligaxka eta final handia orduko; azken agertoki hori, hain zuzen, otsailaren 15ean jokatuko dute. Lehen ligaxka hilaren 27tik abenduaren 29ra bitartean jokatuko dute; multzo bakoitzeko lehen bi bikoteek lortuko dute finalerdien ligaxkarako sailkapena. Jarraian, iazko formatuari jarraiki, finalaurrekoetako lau bikoteek, denek ala denek, elkarren aurka jokatu beharko dute. Azken ligaxka horretako lehen bi sailkatuak izango dira finalistak.
Ligaxka jardunaldi guztietarako zita 19:30ean izango da, urriaren 27koarena izan ezik; 18:00retan zabalduko dituzte Jai Alaiko ateak. Finaleko jardunaldia, ostera, 12:00etan ipiniko dute abian. Liga egutegian slam kategoriako lehiaketa izanik, Winter Seriesaren garaileek 2.000 puntuko uzta patrikaratuko dute; txapeldunordeek, aldiz, 1.200 puntukoa; hirugarren eta laugarren sailkatuek, 750ekoa. Puntu horiei ligaxkan aurretiaz jasotakoak gehitu beharko zaizkie.
Eraman Jai Alaiko antolatzaileek txapelketaren hazkundeak kirolaren hazkundean edukitako lotura zuzena azaldu dute: “Duela urte batzuk, AEBko atea zarratu zenean, askok uste zuten zesta-punta negu sasoia biziberritzea ezinezkoa izango zela; frogatuta geratu da Winter Seriesak horri buelta ematea lortu duela, urte osoko egutegia osatu baita, Hego zein Ipar Euskal Herrian”. Gainera, emakumezkoek ere merezi duten plaza lortzeko bideari ere ekin diote: emakumezkoen Jai Alai Liga sortu da, eta emakumezko puntisten zirkuitua “hazten eta hazten” ari da. Ez hori bakarrik: azken urteotan, gorakada handia izan dute zesta-punta eskoletako fitxek; “biderkatu” egin dira umeen izen emateak.
Urtero modura, etxeko puntista bat egongo da estreinako jardunaldiko protagonisten artean. Aurten Unai Lekerika atzelariari dagozkio herrikideen aurrean lehen partida jokatzeko ohorea eta ardura, Alex Goitia markina-xemeindarragaz batera. Johan eta Gorka Sorozabal anaia miarriztarrak edukiko dituzte aurrez aurre lehendabiziko lehian. Bestalde, Ekaitz Mendizabal Goixerri eta Mikel Mantzisidor mutrikuarrek beren herrikide Eñaut Urreistiren eta 2026ko udaberrian erretiroa hartuko duen Jai Alai Ligaren txapeldun Imanol Lopez beterano zumaiarraren aurka neurtu beharko dituzte indarrak. Lopezek, hain zuzen, debuta Jai Alain egin zuen, 2003an, eta ordutik zesta-puntaren atzelari trebeena izaterainoko ibilbide arrakastatsua osatu du.
Imanol Lopez: “Nazioen Ligan, Donibane Lohizunen, Markina-Xemeinen eta Jai Alai Ligan garaipena lortu dut: agur esateko momentu eztian nago”
Kirol jubilazioa “mailarik gorenekoan” egin ahal izatea “inportantetzat” du gipuzkoarrak: “Nazioen Ligan, Donibane Lohizunen, Markina-Xemeinen eta Jai Alai Ligan garaipena lortu dut: agur esateko momentu eztian nago. Urreistik eta biok bikote sendoa osatuko dugu, baina elkarregaz entseatzea eta taldean lan egitea beharrezkoa izango da, makina olioztatzeko. Aurrelari gazte batekin jokatzea erronka da niretzat, eta gauza politak egin ditzakegu. Ez dut hautagaitzez hitz egin gura, faborito izatea kantxan frogatu beharra baitago”.
Eñaut Urreisti: “Erkiaga eta Ibarluzea, txapelketaren azken bi garaileak, dira hautagai handienak; beraiei dagokie azken bi aldietan lortutakoa defendatzea”
Bere bikotekide Urreistirentzat konfirmaziorako aldia izan daiteke: iaz, beterano artean, onenen pare aritu zen, eta aurten iazkoa nahiz orduz geroztik frogatutako guztia berrestea suertatuko zaio. Aurtengoa “beste egoera batean” hartuko du mutrikuarrak: “Lopezekin jokatuta, begi gehiago izango ditugu gainean eta, alde horretatik, badago presio puntu erantsi bat“. Aurrelariak ez du uste faborito handiak direnik, beste izen-abizen batzuk baititu gogoan: “Erkiaga eta Ibarluzea, txapelketaren azken bi garaileak, dira hautagai handienak; beraiei dagokie azken bi aldietan lortutakoa defendatzea”.
Ispastertarrak eta Jai Alaik “nahasketa esplosiboa” osatzen dutela adierazi du Urreistik, baina finalera sailkatzeko bezainbeste “maila fisikoa eta teknikoa” dutela azpimarratuta. Lehiaren lehen jardunaldian hiru mutrikuar kantxaratzeaz ere mintzatu da: “Horrek erakusten du Danok Baten harrobi lan handia egiten dutela”.
Magic Cityko ordezkaritza.
Hain zuzen, aurtengo ekitaldian Miamiko (AEB) Magic City kristalezko pilotaleku laburretik etorriko dira Winter Seriesa jokatuko duten zenbait protagonista: Goixerri, Goitia eta Thomas Urrutia donibanegaraztarra. Ez dira ozeanoa gurutzatu beharko duten bakarrak izango: Sorozabal anaiek Daniako hiru hilabeteko denboraldia jokatuko dute; ligaxka burutu ostean egingo dute bertara bidaia. Finalerdietarako sailkapena poltsikoratuz gero, bertatik etorriko lirateke jokatzera. Hala, abenduaren 8tik aurrerako jardunaldiak AEBetako denboraldiaren araberakoak izango direla aurreratu dute.
Bikote lehiakorrak eta denetarikoak osatu dituzte aurtengo ekitaldirako: kasu batzuetan, eskarmentudun puntistak altxor gazteekin uztartu dituzte; beste zenbaitetan, aldiz, orain arte funtzionatu duten ekuazioak berretsi. Esaterako, azken bi aldietako garaileek, Aritz Erkiagak eta Ion Ibarluzeak, hirugarren txapela jarraian janzteko saiakera egingo dute. Erkiagak orain arteko lau txapelketetatik hiru irabazi ditu: lehena Jon Bullet Zabala markina-xemeindarragaz; azken biak, Ibarluzeagaz. Zalantza barik, bikote hautagaietako bat osatuko dute ispastertarrak eta markina-xemeindarrak.
Ion Ibarluzea: “Txapelketa garaipenez hasi behar dugu, arazo larrietan ez sartzeko. Azken lehia bietan nagusitu izanak ez digu finalerako sailkapenik ziurtatzen”
Erkiagak, baina, aurtengo lehiakortasuna azpimarratu du: “Urreisti-Lopez bikotea gu besteko hautagai izan daiteke, baita Barandika-Basque ere. Sorozabaltarren gaztetasuna ere ezin ahaztu liteke. Beraz, hautagaitza argirik ondorioztatzea ez da erreala”. Ibarluzeak, aurkari sorta zabal hori tarteko, azaldu du iazko jokoak aurten “ez duela balio“: “Txapelketa garaipenez hasi behar dugu, arazo larrietan ez sartzeko. Azken lehia bietan nagusitu izanak ez digu finalerako sailkapenik ziurtatzen”. Presio kontuez, baina, ez dute ezer entzun gura: “Guk irabazi dezakegula sobera frogatu dugu, gainontzekoei dagokie irabazi beharraren presioa sentitzea”.
Aritz Erkiaga: “Guk irabazi dezakegula sobera frogatu dugu, gainontzekoei dagokie irabazi beharraren presioa sentitzea”
Etxeko puntista Xabier Barandika ere hautagaien artean dago. Berriki Jai Alai Ligako garailearen gerriko horia eta Ezkurdin garaipena lortuta, Thibault Basque bidartar atzelari fidagarria izango du bikotekide. Elkarren “osagarri” diren jokoak dituzte: “Azkenaldion, Basquek eta biok ez ditugu partidurik onenak jokatu elkarrekin aritu garen azken aldietan, baina oro har bikain moldatzen gara, eta kantxa barruan behar dudan jokoa ematen dit”.
Xabier Barandika: “Frontoi barruan ez ezik, kanpoan ere txapelketak sortzen duen presioa kudeatzen jakin behar da, beti ezustekoak egoten baitira”
Erkiaga-Ibarluzea eta Urreisti-Lopez moduko bikote “faboritoen” aurrean, argi dute beren jokoa zein izan behar den: “Basqueren dominantzia garrantzitsua izango da, nik aurrean errematatzeko aukerak eduki ditzadan”. Halaber, tentsioaren kudeaketa gako izan daitekeela argitu du: “Frontoi barruan ez ezik, kanpoan ere txapelketak sortzen duen presioa kudeatzen jakin behar da, beti ezustekoak egoten baitira”. Emaitzak, behintzat, alde ditu: “Durangon final ederraz gozatu nuen, Lekerikagaz; Winter Seriesen, elkarren aurka aritzea tokatuko zaigu, baina, sikiera, biok maila fisiko onean iritsiko gara”.
Kantxa barruan “aspaldiko hoberen” ageri da, hain zuzen, Lekerika: “Errebeskadaz inoizkorik gehien atzeratu dut pilota azken hitzorduetan, eta alde teknikotik ere sasoiko nago. Goitiak eta biok bikote ederra osatzen dugu: pilotari gaztea da, baina badu eskarmentua; Markina-Xemeinen irabazi zuen, eta Lekeition garaipen ederra lortu genuen elkarregaz. Pilotalekuan ondo gidatuz gero, Goitiak asko eskaini dezake Winter Series honetan”.
Unai Lekerika: “Pilotalekuan ondo gidatuz gero, Goitiak asko eskaini dezake Winter Series honetan”
Azken Urriko Azken Astelehen denetako protagonistetako bat izan da Lekerika, eta aurten ere halaxe izango da: “Goizean goiz postuetatik osteratxoa egitea gustatzen zait, eta lehen ordutik jendeak berotasuna erakusten dit. Ardura handia da txapelketaren lehen jardunaldian eta halako egun berezi batez jokatzea, baina gustura asko egiten dut”.
Urrutiak Julen Del Rio gasteiztarra edukiko du frontoiaren atzealdeko koadroen jagole. Azken bikotea iaz finalera iritsitako Ludovic Ladutxe getariarrak eta Zabala beteranoak osatuko dute. Honako bikoteak ageri dira A multzoan: Erkiaga-Ibarluzea, Johan-Gorka, Goitia-Lekerika eta Ladutxe-Zabala. B multzoari dagokionez, ondorengoek osatua dago: Urreisti-Lopez, Goixerri-Mantzisidor, Urrutia-Del Rio eta Barandika-Basque.
Bonuek hegan egin dute.
Puntistentzat ez ezik, jarraitzaileen agendetako txapelketarik garrantzitsuenetako bat izatera iritsi da Winter Seriesa, garrantzitsuena ez bada. Horren erakusle da bonuen salmentak emandakoa: ordubete inguruz egon dira salgai, den-denak agortu arte. Edozelan ere hitzordu guztiak telebistaz zein Internetez jarraitzeko parada egongo da: ETB1ek astelehenetan emango ditu, 22:20an hasita; EITBren webgunean jarraitzeko aukera ere egongo da. Finala, berriz, zuzenean emitituko dute.
