475 lagun inguru batuko ditu Aulestiko XVIII. Ermitatik Ermitara mendi martxak
Zapatuan [urriak 18] egingo dute mendi martxa, eta ibiltariek bi ibilbide izango dituzte aukeran. 08:00etan ekingo diote ibilbide luzeari, eta 10:30ean laburrari.
475 lagun inguru batuko dira zapatuan [urriak 18] Aulestiko XVIII. Ermitatik Ermitara mendi martxan. Antolatzaileek jakitera eman dutenez, egunean bertan ere izena emateko aukera egongo da herriko plazan. Hala ere, egunean bertan izena ematen duten ibiltariek ez dute ziurtatuta edukiko oparia.
Bi ibilbide egongo dira zapatuan: luzea eta laburra. Ibilbide luzea 25 kilometrokoa izango da, bost ordu eta erdi inguruko iraupenagaz, gutxi gorabehera. Goizeko 08:00etan ekingo diote martxari, herriko plazatik: San Anton, Goierri, Urregarai, Malats, Zubero, Urriola, Murelaga, Garatxaga, Lekerika, Ilunzar eta Nareatik pasako dira. Ibilbide laburra 10:30ean hasiko da, parketik. 10 kilometroko ibilbidea izango da, eta gutxi gorabehera, hiru orduko iraupena izango du. Madalena, Murelaga, Garatxaga, Lekerika eta Narea pasa ondoren, herriko plazan amaituko dute.
Antolatzaileek jakinarazi dute ibilbidean janaria eta edaria egongo dela, eta 12:30etik 15:00etara kopaua egongo da parte hartzaile guztientzat herriko plazan: “Kopaua jateko eskumuturrekoa aurkeztu beharko da”. Horrez gain, gosaltzeko zabalik egongo dira herriko tabernak, eta parte hartzaileek kotxea aparkatzeko aparkalekuak zehaztuta egongo dira. Ibilbidea amaitzean dutxak egongo dira parte hartzaileentzat. “Debekatuta dago txakurrak ekartzea”, azaldu dute antolatzaileek.
Aurretiaz izena eman dutenek mendiko makila eskuratuko dute, eta egunean bertan ematen dutenek ez dute ziurtatuta edukiko oparia. Horrez gain, prezioan aldaketa egongo da: 14 urte artekoek 12 euro ordaindu beharko dituzte, eta 15 urtetik gorakoek, berriz, 20.
Behin martxa bukatuta, Hemen bertokoako produktuez betetako otzarak zozketatuko dira.
