Ekologistek "ondo" baloratu dute Eusko Jaurlaritzak angularen arrantza kanpaina bertan behera uztea
Eguzkik eta Mutriku Natur Taldeak «ondo» baloratu dute Eusko Jaurlaritzak angularen arrantza kapaina bertan behera uztea. Arartekoaren ebazpena «erabakigarria» izan dela adierazi dute.
Eusko Jaurlaritzak bertan behera utzi du angula arrantzatzeko 2025-2025 kanpaina, eta Eguzkik eta Mutriku Natur Taldeak honen gaineko balorazio “ona” egin dute. “Oso albiste ona da Eusko Jaurlaritzak angula arrantzatzeko hurrengo kanpaina bertan behera utzi izana. Oso albiste ona da Jaurlaritzak espezieraren egoera oso kritikoa dela behingoz onartu izana, batez ere kontuan hartuta azken urteotan profesionalizazio-dekretuaren bide angularen arrantzari kosta ahala kosta eusteko nolako ahaleginak egin dituen”.
Eusko Jaurlaritzak adierazi duenez, erabakia hartzeko orduan azken txosten zientifikoan oinarritu da: “Hala ere, azken txosten horiek zientzialariak aspalditik esaka ari direna berrestera datoz. Beraz, Gobernuak erabakia espeziaren egoera larriaren berri ematen duten txostenetan hartu balu, aspaldidanik hartuta egongo litzateke erabakia”. Txosten zientifikoez gain, Arartekoak ekainaren 4an angulen arrantzari buruz argitaratutako ebazpena ere aipatu du Eusko Jaurlaritzak, eta Mutriku Natur Taldea zein Eguzkiren ustez, Aratekoaren ebazpena “erabakigarria” izan da.
Izan ere, azaldu dute ebazpen hartan Arartekoak “egurra eman ziola Eusko Jaurlaritzari”: “Eusko Jaurlaritzak angulari buruz onartu zuen dekretuaren helburu nagusia espeziearen arrantza profesionalizatzea da, eta ez dator bat Europar Batasunean alor honetan indarrean dagoen erregulazioaren helburu nagusiarekin: angula babestea”. Beraz, Arartekoak Elikadura, Landa Garapena, Nekazaritza eta Arrantza Sailari gomendioa luzatu zion: “Angularen arrantzaren erregulazioa berrikustea sustatu, Europar Batasuneko zuzenbidetik eratorritako aingira europarraren populazioa berreskuratzeko eskatzen diren neurrietara egokitzeko”.
Aurrekariak. Mutriku Natur Taldeak aurkeztutako kexari erantzunez argitaratu zuen Arartekoak ebazpena: “Ebazpena bat dator ia puntuz puntu talde ekologistok azken urteotan auzi honetan defendatu dugunarekin”.
Europar Batasunak 2023ko otsailean argitaratutako araudi baten bidez, angularen arrantza profesionala murriztu egin zuen, eta aisialdikoa, berriz, guztiz debekatu zuen, “Angula galzorian eta segurtasun muga biologikoetatik kanpo zegoelako”. Hala, Euskal Autonomia Erkidegoan debekatuta gelditu zen, aisialdikoa zelako ordura arte Bizkaian eta Gipuzkoan egiten zen angula arrantza bakarra. “Orduan, Jaurlaritzak profesionalizazio dekretua atera zuen, Europar Batasunaren erabaki berrietara egokitzeko tresna zela argudiatuz, baina guk ohartarazi genuen bezala, hura ez zen egokitzea, araudiari iskin egitea baizik, arrantzatzen jarraitu ahal izateko”.
Hala ere, bi talde ekologistek profesionalizazioa eta honi lotutako erabakiak justifikatzen zituen txosten zientifiko eta teknikorik ez zegoela ohartarazi zuten Arartekoa, eta bide horretatik, Arartekoak Jaurlaritzak aurkeztutako txostena ikusi ondoren adierazi zuen bakar baten ere ez zela bildu angularen arrantza profesionala Euskal Autonomia Erkidegoan sartzea justifikatzen zuen erabakia hartzeko prozesua: “Txosten tekniko batek ere ez ditu justifikatzen, ezta aipatzen ere, aisialdiko arrantza profesionalizatzeko arrazoiak, ezta arrantza profesionalerako 150 lizentzia edo 550 kiloko arrantza kupoa ezartzea erabaki duen irizpide tekniko edo zientifikoa ere”.
Euskadiko Aholku Batzorde Juridikoak dekretuaren gabeziak txosten batean jaso zituen 2024an, baina Jaurlaritzak “ezikusiarena” egin zuela diote ekologistek, txostena ez zela “loteslea” argudiatuz. Honen aurrean horrela erantzun zion Arartekoak: “Aholku Batzorde Juridikoaren irizpena loteslea ez bada ere, lotesleak dira horren txosten zorrotzak jasotzen dituen gogoeta juridikoak”.
Hala, Arartekoaren gomendioaren aurrean, Eusko Jaurlaritzak izango zuen erantzunaren zain zeuden ekologistak: “Arartekoak bigarren aukera eman dio, eta oraingoan bai, hartu du. Hori bai, lehenengo aukera alferrik pasatzen uztearen ondorioz, aingira europarra espezie gisa eta biodibertsitatea atera dira galtzaile”.
