544 mendizalek parte hartu dute XVIII. Ermitarik Ermita mendi martxan
12:30ak aldera hasi dira heltzen herriko plazara lehenengo partaideak, eta mokadutxoa eduki dute bertan zain. Antolatzaileak pozik agertu dira egunagaz: "Eguraldiak lagundu digu, eta dena ondo joan da".
Bertokoen nahiz inguruko mendizaleen artean errotuta dago Aulestiko XVIII. Ermitarik Ermita mendi martxa, eta gaurkoa [urriak 18] izan da horren erakusgarri. Gainera, mendira joateko eguraldi ezin hobeagoa izan dute lagun, eta hala, 544 pertsona elkartu dira gaur Aulestin, ibilbide luzea nahiz motza egiteko asmoz.
Luzeak 25 kilometro eduki ditu, eta motzak, 10 kilometro. Hala, 12:30ak jotzerako hasi dira lehen mendizaleak herriko plazara heltzen, eta minutuak pasa ahala, gero eta jende gehiago elkartu da bertan antolakuntzak ipinitako mokadutxoa jateko. Hain zuzen ere, 50 pertsona inguru aritzen dira mendi martxa antolatzen, eta pozik agertu dira aurtengoagaz: “Jende asko ari gara hau aurrera ateratzeko lanean. Ibilbidea markatu, bideak garbitu, jatekoa egin, zerbitzatu, dena jaso… asko dago egiteko, eta dena herritarron artean egiten dugu. Jendea ari da plazara heltzen astiro-astiro; pozik gaude aurtengoarekin. Eguraldi ona egin digu gainera, eta ondo joan da dena”.
Antolakuntzakoak ez ezik, partaideak ere pozik agertu dira mendi martxagaz: “Oso gustura ibili gara, asko gustatu zaigu. Gainera, dena oso ondo antolatuta dago: jateko eta ura edateko postu pila bat daude bidean, eta amaieran plazan mokadutxoa ere bai. Eskertzekoa da antolakuntzatik egin duten lana. Bidea ere oso polita izan da; guk luzea egin dugu, eta egia da 25 kilometro luze egiten direla, baina hala ere goiz polita pasa dugu”.
