Euskal Kostaldeko Geoparkeak indarrak batu ditu Espainiako Estatuko beste hainbat geoparkerekin
Espainiako Unesco Geoparkeen Elkartea sortu dute ekintza bateratuak bultzatzeko asmoz. Leire Barriuso Euskal Kostaldeko Geoparkeko gerentea izango da elkarteko lehendakariordea.
Espainiako Unesco Geoparkeen Elkartea sortu dute.Geoparkea Unesco Geoparkeen Sareko hainbat geoparkek elkarte bat eratu dute “lurraldeen arteko lankidetza eta baterako proiektuak sustatzeko” asmoz, eta Euskal Kostaldeko Geoparkeak ere bat egin du egitasmoarekin. Hala, joan den astean egin zuten aurkezpen ofiziala, Montserraten egindako Jardunaldi Irekietan.
Espainiako Unesco Geoparkeen Elkartea modura izendatu dute elkartea, eta ekimek komunak egitea erraztu nahi du. Horien artean egongo dira, bestean beste, kontratazio partekatuak egitea, laguntzak eta dirulaguntzak eskuratzea, eta zientzia, turismoa eta hezkuntza sustatzeko proiektuak koordinatzea. Halaber, Geoparkearekin batera elkarte berriko kide dira Las Loras, Origens, Cabo Ortegal, Maestrazgo, Montañas do Courel, Catalunya Central eta Lanzarote ere. Azaldu dutenez, aurreikuspenen arabera, datozen egunetan beste bi geoparke gehituko dira elkartera.
Leire Barriuso Euskal Kostaldeko Geoparkeko gerentea izango da elkarteko lehendakariordea, eta positiboki baloratu du elkartearen sorrera: “Elkarteak geoparkeei bultzada emango die, eta nortasun eta ikusgarritasun handiagoa ekarriko du”.
Jakitera eman dutenez, elkartearen eraketak geoparkeei esparru komun bat emateko beharrari erantzuten dio. Izan ere, azken urteetan lurralde horien arteko lankidetza “nabarmen” hazi da, eta baita administrazio publikoekin eta gizartearekin duten harremana ere: “Lan hori sendotzeko eta geoparkeen kudeaketa eraginkorragoa eta agerikoagoa errazteko, beharrezkoa zen beste urrats bat ematea haien antolaketan”. Hori horrela, elkarte berriak baterako ekintzak bultzatzea erraztuko du, besteak beste, turismo azoketan parte hartzea, sustapen partekatua, Espainiar Estatuko turismo eta hezkuntza produktuak sortzea edo sare osoari mesede egingo dioten finantzaketa komuneko proiektuak garatzea.
Ildo beretik, elkarteak baditu beste helburu batzuk ere: tokiko ekimenak eta ekimen ekonomikoak babestea, bere kideen arteko eta beste erakunde batzuekiko lankidetza indartzea, eta ordezkatzen dituen lurraldeen zientzia, hezkuntza, turismoa eta garapen iraunkorra bultzatuko dituen baliabideak eta jarduerak kudeatzea. Ekintza horien bitartez, Espainiar Estatuko Unesco geoparkeek euren “presentzia eta koordinazioa indartu” nahi dute, “herrialdeko geologia eta kultura ondarea babesten eta hedatzen lagunduko duten sinergiak sortuz”.
