Alex Goitia-Unai Lekerika eta Eñaut Urreisti-Imanol Lopez bikoteek Eusko Label Winter Series txapelketaren lehen partiduak irabazi dituzte. Gogoangarria izan da Urriko Azken Asteleheneko [urriak 27] estreinako jardunaldia: partidu apartez gozatu dute Jai Alai frontoia lepo bete duten ikusleek.
Udagoienean egonik ere, iritsi da negua. Eta, neguarekin batera, neguko zesta-punta txapelketarik entzutetsuena: Eusko Label Winter Series. Urriko Azken Astelehenez eman zioten hasiera atzo [urriak 27], ohiko modura, lehiari: bikote hautagaietako bat, Eñaut Urreisti mutrikuarrak eta Imanol Lopez zumaiarrak osatua, kantxaratu zen, Ekaitz Mendizabal Goixerri eta Mikel Mantzisidorren kontra. Lehendabizikoek beren hautagaitza plazaratu zuten, mutrikuar gaztearen bizitasuna eta zumaiar beteranoaren eskarmentua maisuki nahastuta. Edozelan ere, etxeko izarretako baten kantxaratzeak harrotu zituen hautsak: Unai Lekerika gernika-lumotarrak bere eskumakadarik onenei eusten diela frogatu zuen, Alex Goitia markina-xemeindar esplosiboarekin bikotea osatuta. Garaipen handia lortu zuten Johan eta Gorka Sorozabal miarriztar anaien kontra.
Argazkia: Eraman Jai Alai.
Sorozabaltarrak izan ziren agintea hartzen lehenak. 3 eta 1 aurreratuta, tantoa dominatzeko asmoa agertu zuten hastapenetik; errebotera heltzea zuten xede, aurkariak tentsiopean ipintzea. Lekerikak, baina, zesta-puntaren katedrala inork baino hobeto ezagutzen du. Material bizia probestuz, bere eskumakadek launa, bosna eta zazpina berdindu zuten partidua, eta horma biko eder batekin 7 eta 8 aurrea hartzera ere iritsi zen. Goitiaren abiadurak eta Lekerikaren indarrak binomio aparta osatu zuten, beren multzoko bikote sendoen kontra giltzarri izan daitekeena. Lehen seteko hamabigarren tantoa gogoangarria izan zen: Lekerikak ia ezinezkoa zirudien pilotakada bat eroan zuen, eta jokaldia txulara biribildu, 9 eta 12koa lortuz. Ondoren, Goitiaren sake errestoak 12 eta 13koa eman zien. Markina-xemeindarra bera arduratu zen lehenengo seta modurik bikainenean zarratzeaz: 12 eta 15.
Bigarren seta miarriztarrentzako egokiagoa izan zen, pilota mantsoagoa tarteko. Lehen lau tantoetan lehiakor azaldu ziren, baina hortik aurrera Goitiak eta Lekerikak aurrea hartu zuten berriro. Markina-xemeindarrak kolore guztietako erremateak egin zituen: horma bikoak, errebotera edota horma bitara sakea eginez. Baina, batez ere, bere elektrizitatea gako izan zen: abiadura eman zion partiduari, bere atzelariak dominantzia eta potentzia bistaratzen zituen artean. Lapurdiko bikoteak markagailuan ez galtzeko saiakera egin zuen, eta asmatu zuten aldeak ahal bezainbeste murrizten. Ez zen nahikoa izan. Ikusleen berotasunarekin eta eraginkortasuna zerion jokoarekin, 12 eta 15eko markagailua errepikatu zuten berdeek. Hala, beraiena moduko multzo gaitzean paparra atera zuten, edonoren mailan egon daitezkeela frogatuz; lau puntu eta 6 tantoko alde edo average-a poltsikoratu zuten.
Argazkia: Eraman Jai Alai.
Lanak aurreratzeaz.
Partiduaren hondarrean, Goitia garaipenaren “inportantziaz” mintzatu zen: “Hurrengo partidua Aritz Erkiaga eta Ion Ibarluzea txapeldunen kontrakoa izango dugula jakinda, inportantea zen lehendabizikoa irabaztea”. Partiduko izar Lekerika ere, pareko moldez azaldu zen: “Iazko Winter Seriesa ez nuen batere gustura bukatu, eta garrantzitsua zen lehen partiduan neure burua ondo ikustea; eskumaz oso seguru ibili naiz, eta ikusleekin ere konexio aparta izan dut”. Goitiak behera nahiz alboz errematatuz, gernika-lumotarra sasoiko dago, eta hori frogatzeko prest: “Aspaldion ez naiz horma bikoak egiten aritu, baina Johanen jokoa ikusita animatu egin naiz, eta bikain atera zaizkit”.
Unai Lekerika: “Iazko Winter Seriesa ez nuen batere gustura bukatu, eta garrantzitsua zen lehen partiduan neure burua ondo ikustea”
Goitiak AEBetatik iritsiberri ekin zion Winter Seriesaeri. Zapatuan iritsi zen Euskal Herrira, eta Jai Alain jokatu eta segidan itzuli behar izan zen. Egutegi estua dute egungo puntistek, eta markina-xemeindarrarena horren erakusle da: “Etxetik pasatuta, entsegu pare bat egin nuen Gernika-Lumon, eta hoberanzko joera nabaritu; Gernika-Lumokoa Miamikoa baino pilotaleku luzeagoa da, baina partiduan, neurriak neurri, dena ondo atera zaidala uste dut; uneoro zesta ederto topatu dut, eta orain bueltatu egin behar naiz”.
Alex Goitia: “Gernika-Lumokoa Miamikoa baino pilotaleku luzeagoa da, baina partiduan, neurriak neurri, dena ondo atera zaidala uste dut”
Beste partiduari zegokionez, Urreistik eta Lopezek iragarpen oro bete zuten, eta garaipen erosoagoa lortu. Ondo landua izan zen beren partidua, neurtua eta segurua. Hala aurrelari gaztea, nola atzelari beteranoa momentu gozoan daude, eta hori sobera frogatu zuten lehen jardunaldian. Goixerrik bere herrikideari erantzuteko saiakera egin zuen, gogotsu aritu zen, baina markagailuak 2 eta 8koa erakutsi zuen hasi bezain pronto. 6 eta 10ekora hurreratzeagatik dre, bikote horiak ez zuen inongo aukerarik laga, eta sei tantoko aldearekin biribildu zuen lehen seta: 9 eta 15. Bigarrenean, urdinen hutsegiteak are agerikoago bihurtu ziren, eta horiek ez zuten inondik inora barkatu. Urreistik, Lopezen gidaritza aparta tarteko, pilotakada zailak eroan zituen, eta aurrealdeko koadroetan erremate ederrak egin zituen. Horietako azkena, 12 eta 15ekoa, sake erresto aparta izan zen.
Argazkia: Eraman Jai Alai.
Bere azken Winter Seriesaren lehen partidua patrikaratuta, Lopezek azpimarratu zuen bere jokoak eta Urreistirenak “ezin hobeto bat egiten dutela”: “Egia da gaurko jokoarekin ezin dugula finalera iristerik espero, baditugu hobetu beharreko ñabardura teknikoak, baina bide onetik goazela ikusten dugu, eta datozen hilabeteetan hobetzeko gogor behar egingo dugu”.
Eñaut Urreisti: “Bagenekien, Imanolek dominatzea lortuz gero, nik nire aukerak edukiko nituela, eta gustura aritu naiz aurrean”
Urreisti “pozarren” agertu zen, Lopez maisuaren apopilo lanetan. Zortzi tanto errematatu zituen pilota motelarekin, erabateko segurtasunez jokatuz: “Bagenekien, Imanolek dominatzea lortuz gero, nik nire aukerak edukiko nituela, eta gustura aritu naiz aurrean”. Hautagaien etiketa jasotzeaz ere mintzatu ziren horiak: “Erkiaga eta Ibarluzea hortxe daude, isil-isilean, eta eurak dira faborito. Hori bai, dakigun modura jokatzea lortzen baldin badugu, aukerekin ibiliko gara; hori geure esku dago, eta horretarako borroka egingo dugu”.
Aritz Erkiagak eta Ion Ibarluzeak Ludovic Ladutxeren eta Jon ‘Bullet’ Zabalaren aurka jokatuko dute bigarren jardunaldian
Hurrengo astelehenean [azaroak 3], txapelketa sobera ezagutzen duten puntistetako zenbaiten txanda izango da: egungo txapeldunek, Erkiaga ispastertarrak eta Ibarluzea markina-xemeindarrak iaz finalera iritsitako Ludovic Ladutxe getariarraren eta lehen Winter Seriesa irabazitako Jon Bullet Zabala markina-xemeindarraren aurka jokatuko dute. Jai Alaiko harmailak, beste behin, lepo beteko diren aurreikuspena dago. Izan ere, jarraitzaileak negu gosez daude, eta zesta-puntaren negua, hain zuzen, iritsi da.
Argazkia: Eraman Jai Alai. 
