24. Korrikaren deiadarra adituz: Atharratzetik Bilbora
'Euskara gara' leloa izango du ardatz 24. Korrikak, Euskal Herriko kale eta etxeak euskararen arnasagaz betetzeko. AEK-k Errigora egitasmoa omenduko du oraingoan, txikitasunaren garrantzia erdigunean jarriz.
Argazkia: AEK. Tipi-tapa tipi-tapa. Badator berriro ere Korrika. 24. Korrika. Atharratzen (Zuberoa) hasi, eta Bilbora arteko ibilbidea izango du oinarri, 2026ko martxoaren 19tik 29ra bitartean, AEKk antolatutako ekitaldi erraldoiak. Horrela, Euskal Herriko txoko guztietako kaleak hartu, eta euskararen aldeko aldarria zabaltzeko asmoz, Euskara gara lelopean arituko dira euskaltzaleak han eta hemen. Aurreratu dutenez, egun osoko jai egitaraua antolatuko dute helmugarako [martxoak 29, Bilbon]. Ibilbide osoa, baina, beranduago jakinaraziko dutela azaldu dute gaur, Gasteizko Izaskun Arrue Kulturgunean egindako aurkezpenean.
Aldiro aldiro omentzen dute norbait, eta 24. Korrikak txikitasunaren garrantzia erdigunean jarri, eta Errigora egitasmoa omenduko du: “Korrikak aitortza egin nahi dio euskaratik, euskararentzat eta euskaraz lanean ari den ekimen herritarrari, egin duen eta egiten ari den lanarengatik”. Horrez gain, babesa eta bultzada eman nahi diola nabarmendu du. Udazkenero ‘Euskarari puzka’ kanpaina abiatzen du Errigorak, eta “orain arte jorratutako bidearen erakusle” da 24. Korrikaren omenaldia: “Nafarroan, euskara ofiziala ez den eremuan, euskalduntzean egin duen ahalegina aintzatzeko era da hau, eta baita etorkizunerako bultzada emateko hauspoa ere. Jarrai dezagun euskarari puzka”.
Argi esan dute: “Hizkuntzak batzen gaitu”. Beraz, komunitatean sinetsi eta pentsatzea berebizikoa zaie AEKko kideei; elkarlanean aritzea. Horren baitan, Lurdes Etxezarreta AEKren Nazio kontseiluko kideak hiru mezu zabaldu ditu: Batetik, euskara ardatz duen komunitatean eroso eta aske bizitzeko nahia: “Euskal Herri euskalduna, feminista, antiarrazista eta goxoa izango da gurea”. Bestetik, presa aipatu du: “Helburu dugun Euskal Herria lortzeko ezin dugu ezer gerorako utzi; orain da unea”. Ze, aipatu du “larrialdi linguistiko bete-betean” dagoela Euskal Herria, eta inguruari eta gaur egungo aldaketei “so eginda”, ziklo berri bat abiatu behar dugula adierazi du. Hirugarren mezua, halaber, instituzioei dei eginez helarazi du: “Euskararen ekosistema babestu eta indartzeko, hizkuntza politika ausarta eta sendoa behar dugu”.
Maialen Begiristain ere AEKren Nazio Kontseiluko kide da, eta azpimarratu du Korrikak “euskara guztiontzat aterpe ireki eta erosoa” dela erakusten duela, edizioz edizio. “Berdin da zer jatorri, zein azal-kolore, euskararen inguruko nolako ezagutza. Garrantzitsuena da guztiontzako lekua dagoela, eta bertan, euskararen baitan, guztion artean eraikita, azkenean aurkituko dugula gizarte-zapalkuntza orotatik babestuko gaituen komunitate berdinzale eta zabala”. Gauzak horrela, Euskal Herrian, euskararen herrian, mundu oso bat sartzen dela gehitu du.
Euskara, arnasa.
Korrikaren arduradun den Ane Elordik ere izan du hitza, eta aurtengo leloaren inguruan jardun da; esan du, Euskara gara leloak jendartea duela helburu, batik bat: “Euskarak denok bil gaitzake, euskara ez baita muga, arnasa baizik. Euskara zubi gisa landu behar da. Euskal herritar guztion hizkuntza komuna izan dadin nahi dugun heinean, kohesio sozialerako tresna ere izango da”. Euskarak jendarteari arnasa ematen diola ere aipatu du, tartean: “Euskal Herriak arnasa berria behar du; euskararen herrira jauzi egin nahi duten guztien herria gara, berton jaioak izan zein kanpotik etorri. Euskara da gure arnasa, elkarren zaintzaren hizkuntza, justizia sozialaren hizkuntza”.
Era berean, Elordi esker onez agertu da Korrika Laguntzaile eta Korrika egiten laguntzen duten guztien aldera: “Guztioi esker, EUSKARA GARA”. Hori guztia kontuan izanik, lekukoa hartu, eta 24. Korrikaren deiadarra aditzera animatu ditu herritarrak; euskararen aldeko mobilizazio handienaren parte izatera. Euskaraz egitera. Bizitzera. Eta gozazera.
24. Korrikaren mezua
Euskara-herria naiz, bizitzeko era, izateko modua. Suaren antzekoa naiz: beti bera, beti berri.
Ongi etorri nire etxera, gure etxera. Iraganetik gaur egunera, ateak beti zabalik ditugun babesgunera.
Zu eta ni euskara gara. Bat gara. Milioi bat euskaldun gara, eta gehiago izango gara. Biziberritzen den komunitate aske eta irekia gara, elkarrekin sortuko dugun etorkizuna. Alderik alde zeharkatuko dugun Euskal Herria gara.
Eman hitza, eta eman pausoa, erdigunean jartzeko aniztasuna eta elkar zaintzea. Eman pausoa, eta aktibatu, lehen lerroan nahi dugu helduen euskalduntzea. Guztiok gara ezinbesteko. Pertsona bakoitzak du balioa; hiztun bakoitzak, garrantzia. Euskaltegian izena eman dugunok, euskara lehen hizkuntza dugunok, kanpotik etorri garenok, euskaraz, Euskal Herrian, ikasi eta bizi nahi dugunok… Guztiok herri bat gara. Euskara gara.
Aditu Korrikaren deiadarra. Izan gaitezen dardara, izan gaitezen indarra. Piztu da Korrikaren garra!
