Jarraikortasunaren saria irabazi dute
Amandarri Triatloi Taldeak Euskal Triatloi Zirkuituan bigarren geratu da. Bilatzen ez duten helburua bada ere, "ezustean" heldu delako, Amandarrikoak lorpenagaz "pozik" agertu dira. Orain, hasi berri duten triatloi eskolaren ikasturtean dute arreta jarrita.
Lasterketak ez dira irabazten bakarrik. Batzuentzat, galduta ere irabazi daiteke, batez ere lasterketetan, non bakarrak irabazten duen. Beste batzuentzat, berriz, soilik lasterketa amaitzea irabaztea izan daiteke. Horretarako, lasterketaren luzera kontuan hartu behar da. Euskal Triatloi Zirkuituak, adibidez, hamabi proba ditu, eta guztiak kontuan hartuta, Lekeitioko Amandarri Triatloi Taldea bigarren izan da. Batzuetan ez duelako onenak irabazten, horrelakoetan jarraikortasunak eta tematia izateak asko balio duelako.
Lekeitioko Amandarri Triatloi Taldeak Euskadiko Txapelketan bigarren postua lortu du, gizonezkoen taldekako sailkapenean. Kirolariak “ezustean” harrapatu ditu lorpenak. Zirkuituari begira egoten badira ere, aitortu dute ez direla horretan oinarritzen: “Ez gara emaitzetatik bizi garen kluba, baina egia da horrelako emaitzak beti direla ongi etorriak, batez ere taldekakoak direnean”. Ilusio hitza errepikatu dute behin eta berriz.
Euskal Triatloi Zirkuituak hamabi proba ditu, eta erdia baino bat gehiago lehiatu behar dira sailkapen orokorrean egoteko. Euskadiko Txapelketaren mailako probek A koefizientea dute, eta 350 puntugaz neurtzen dira; gainerako probek B koefizientea dute, eta 300 puntu banatzen dira. Behin-behineko sailkapenek parte-hartzaile bakoitzaren emaitza guztiak dituzte, eta zazpi denbora onenak hartzen dituzte kontuan. Hau da, sariak emaitzak bakarrik ez, parte hartzea eta erregulartasuna ere hartzen ditu kontuan.
Irabazleak “pozik” daude, batez ere, Amandarriren “lehiatzeko ilusioa eta gogoa” saritu delako. Ez dute urteko helburu bezala izan, eta horregatik, ongi etorria bikaina izan da taldean. Azaldu dutenez, Alusigma bezalako taldeek ez dituzte proba guztiak lehiatzen, bestelako zirkuituetan ere parte hartzen dutelako: “Euskal Herriko talderik onena eta indartsuena da Alusigma”. Horrelakoek mesede egin diete; izan ere, parte hartu duten zazpietatik bost irabazi dituzte. Amandarriren parte hartzea “zabala bakarrik ez, ona ere” izan da zirkuituko proba askotan: Hondarribiko, Mutrikuko eta Bilboko triatloiak irabazi dituzte aurten taldeka. Futbolagaz alderaketa egin dute, liga erregularrenak irabazten duelako eta Txapeldunen Liga talderik onenak.
Izarra
Era berean, Mikel Arrasateren denboraldia nabarmendu dute Amandarritik. Iaz, Alpe d’ Huez-eko lasterketa irabazi zuenetik, “etengabeko hobekuntza” izan du gazte lekeitiarrak: “Maila oso altuko probak irabazi ditu, Lekeition bigarren izan zen, baina Olinpiar Jokoetan lehiatzen duen australiar bati korrikako eremura arte eutsi zion”.
Arrasateren “umiltasuna” nabarmendu dute, baita gauza zailak erraz egiten dituela ere: “Egunerokotasunean berarekin gaudenok agian ez gara konturatzen zelako kirolaria dugun gure etxean. Ikusgarria da egin duen denboraldia, txapela kentzekoa». Hori gutxi ez eta, urriaren hasieran lehen aldiz ironman erdia osatu zuen Iparraldeko Landetako Challenge Vieux Boucau lasterketan. Hau da, 1,9 kilometro igerian, 90 kilometro bizikleta gainean eta 21,1 kilometro korrika egin zituen. “Europa mailan punta-puntako triatloia da, irteera lerro izugarri batekin”, azaldu dute. Distantzia horietan parte hartu zuen lehenengo aldia izan bazen ere, ez zuen “arazorik” izan. Hain zuzen ere, lasterketa “bikainaren” ostean, seigarren postuan amaitu zuen Arrasatek, “izugarrizko emaitza” lortuz.
“Ez gara emaitzetatik bizi garen kluba, baina egia da horrelako emaitzak beti direla ongi etorriak, batez ere taldekakoak direnean”
Horregatik, eta orokorrean denboraldian izan dituen emaitza ikusgarriengatik, beste talde batzuetako eskaintzak mahai gainean ditu. Arrasateren izena zabaldu bakarrik ez; oro har, bere lorpenekin, Amandarrirena ere gero eta gehiago zabaldu da.
Hala ere, argi dute taldearen helburua bestelako bideetatik doala: “Gure sena ez da aldatzen; jendea probetan izena ematera animatu nahi dugu, eta lehiatzeko beldur hori kendu. Azken batean, badaude soilik entrenatzen eroso daudenak, baina batzuetan beharrezkoa da erosotasun horretatik ateratzea eta norberari erronkak jartzea”.
Lan karga handiena
Orain, ikasturte hasieragaz batera, triatloi eskolagaz hasi berri dira beste urte batez. 55 ume inguru dituzte, eta pozik daude monitoreak ere lanerako daudelako. “Lagun kopuru aldetik, nahikoa egonkor mantentzen gara. Ezingo genituzke beste asko hartu, gure egiturak ez duelako beste askotarako ematen”. Eskola dute oinarri, eta helburu dute “bizi ohitura onak hartzea eta euskaraz kirola egin eta kirol minoritarioak erakustea”. Horretarako, euskara eta formakuntza hezitzailea “ezinbestekotzat” jotzen dituzte. Azken batean, eskola da “lan karga handiena” eragiten diena, antolaketa eta funtzionamenduari dagokionez. Nagusiena entrenatzeko zein lehiatzeko «errazagoa» dela diote, bakoitzak bere antolaketa propioa egiten duelako, taldekako entrenamendu saioak osatzen saiatzen badira ere.
Aurreko urteetan bezala, Zornotzako taldekako proban hasiko dute denboraldi berria, otsailean: “Gurea bezalako klubetako talde sena bultzatzen duten lasterketak dira”. Baina oraindik hilabeteak falta dira horretarako. Lekeitioko eta Zarautzeko triatloiak begiz jota dituzte, baina “helburu handirik gabe”. Izan ere, lasterketetan parte hartzen jarraituko dute, eta emaitzak, modu batera edo bestera, helduko dira, bakoitzak bere lorpenak dituelako.
