Erroak Loran: egun bete-betea berriatuarrentzat
Berritxuarren Jaia ospatzen ari dira herritarrak, gaur [azaroak 29] dute egun handia bazkari herrikoiagaz: 350 lagun inguru elkartu dira.
Sangregorioak herriko jaiak dira Berriatuan eta Erroak Loran herritarren jaia. Atzo [azaroak 28] Berritxu Sariaren ekitaldia osatu zuten frontoi txikiko karpan. Hain zuzen ere, Berritxuarren Jaia asteburu guztira zabaltzen da. Hala ere, gaur [azaroak 29] dute egun handia bazkari herrikoiagaz.
Aurten gainera beste modu batera eman diote hasiera egunari. Lehen aldiz Berritxuko Krosa lehiatu dute Erroak Loranen egitarauaren baitan. Egutegian tokia ezin aurkiturik ibili ostean asteburu berezian sartu dute eta “pozik” agertu dira herritarren erantzunagaz: 72 korrikalarik parte hartu dute.
Behin eguneko kirola osatuta, bete-betean murgildu dira berriatuarrak jai giroan. Lami eta Maru erraldoiak izan dira ospakizunei hasiera emateko arduradunak. Erraldoien atzetik kalejira osatuz zeharkatu dituzte herriko kaleak. Dantzak ere ez dira falta izan ibilbidean. Mendibarren frontoian amaitu dute ibilbidea.
[IKUSI III. BERRIATUKO KROSEKO ARGAZKIAK]
Pilotalekuan eguerdirako dagoeneko mahaiak eta aulkiak jarrita zituzten: guztira 350 lagun inguru elkartu dira bazkarian. Umeen menuari dagokionez, patea, urdaiazpiko kroketak, hanburgesa eta saltxitxak parrilan patatekin, izozkia eta ogia eta edariak osatu dute menua. Helduena iberikoak, entsalada mixta, baserriko oilaskoa parrilan, txerri saiheskiak parrilan, limoizko sorbetea kabagaz, ogia, kafea eta edariak (ura, ardo beltza, ardo txuria, klaretea eta sagardoa) ditu. Azkenik, menu beganoa ere jarriko dute aukeran, hurrengokoak dira jatekoak: entsalada mixta, kroketa beganoak, barazki menestra, lasaña beganoa eta postrea.
Iratzar erromeriagaz luzatuko dute eguna eta gaua berriatuarrek nahi dutenera arte: 19:30etik 21:30era egingo dute kontzertuko lehen zatia eta 22:30etik 24:00etara bigarrena. Domekan [azaroak 30], 18:00etan, Nerea Gartzia eta Ainhoa Etxebarria ondarrutarrek Hil da jainkosa antzezlana eskainiko dute bideogelan Erroak Loran jaialdiari amaiera emateko.
