Ondarroako Udalak 2026ko aurrekontua onartu du, aurreko bi urteetakoa baino ia mililoi eta erdi handiagoa
2026ko aurrekontua 13.574.397,07 eurokoa izango da. EH Bilduk aurrekontuen aldeko bozka eman du eta EAJtak aurkakoa. Anexuko aparkalekuko obra egitea izango da proiektu nagusia.
2026 urterako aurrekontua onartu du Ondarroako Udalak. Ondarroako Udala. Joan den asteko Ondarroako Udalaren osoko bilkuran 2026 urterako aurrekontuak onartu ziren: EH Bilduren aldeko botoagaz eta EAJren aurkakoagaz. Hala, 13.574.397,07 euroko aurrekontua izango da datorren urtekoa, 2024 eta 2025 urteetakoa baino ia milioi eta erdi handiagoa. Aurrekontuetako inbertsio nagusia Anexuko aparkaleko obra egitea izango dela azpimarratu dute udaletik: “Telesforo Urrestiren akzioen salmentatik eratorritako 1.200.000 euro erabiliko dira honetarako”.
EAJko bozeramaile den Aitor Basterretxeak kontrako botoa ematearen arrazoiak azaldu zituen osoko bilkuran: “Ez dugu astirik izan aurrekontua aztertzeko eta horregatik bozkatu dugu aurka. Horrez gain, 2025ean 2024ko aurrekontua luzatuta izateak aukera gehiago ematen zituen urte guztian lanketa handiagoa egiteko, batez ere inbertsioen atalean. Abenduko plenoan edo urtarrilekoan onartzea ere posible izango litzateke”. Hitz hauen aurrean, Urtza Alkorta alkateak erantzun zion erronka bat zela urteetan egon den egoerari buelta emateko; hau da, aurrekontuak urtarrilaren 1erako erabilgarri izatea: “Horregatik eman da egoera hau”. EAJtako ordezkariek “begi onez” ikusi zuten alkateak esandakoa: “Aukera hau baliatu behar da dena garbitu eta berriro hasteko, eta datorren urterako plangintza kronologikoa adostu bat egiteko. Elkarrekin batu eta denborak adostu ditzakegu”. Alkortak gogorarazi du urte “asko” direla urtarrilaren 1erako aurrekonturik izan ez dutena: “Urte asko dira urtarrilaren 1erako aurrekonturik izan ez duguna eta hori zen, gure ustez, garrantzitsuena, likidazioko diruak eta Telesfororen diruak ere aurrekontura ekartzeko eta herriak dituen beharrizanei urte hasieratik erantzun ahal izateko. Aurrekontuak zenbat eta beranduago onartu, orduan eta zailagoa da gero asmoak exekutatzea. Horrez gain, langileen zeregina ere azpimarratu nahi dut, beraien ekarpenek eta sartutako orduek askotarako eman dutelako egoerari buelta emateko”.
Milioi eta erdi handiago. Ondarroako Udaletik zehaztu bezala, datorren urteko aurrekontuak 2024 eta 2025 urteetakoa baino ia milioi eta erdi handiagoak izango dira, udalkutxa funtsetik ohikoa baino diru gehiago jasoko duelako udalak. Hala ere, Alkortak nabarmendu duenez, igoerak ez du ematen udalak beregain hartu behar dituen eta izatez bere eskumenekoak ez diren oinarrizko zerbitzuak ordaintzeko haina: “Hezkidetza egitasmoa, gazteentzako psikologia zerbitzua, mugikortasuna, sexu aholkularitza bulegoa, emakumeentzako aholkularitza juridikoa… zerbitzu horiek oinarrizkoak dira ondarrutarrentzat, eta berez, ez dagokio udalari horiek ematea”.
Anexuko aparkalekua. Ondarroako Udalak Telesforo Urrestiren akzioetatik jasotako dirutik 1,2 milioi euro erabiliko ditu Anexuko aparkalekuko obretarako: “Hasieratik esan genuen diru hori inbertsio estrategikoak eta herriaren etorkizunerako oinarrizkoak zirenak egiteko baliatuko genuela, eta hau da horietako lehena”. Gainera, herrian dagoen aparkaleku “gabezia” ikusita, Anexukoa hobetzea “funtsezkoa” dela nabarmendu dute: “Bi urteren ostean, baimen guztiak lortu ditu udalak Anexuan aparkaleku egoki bat egiteko. baimen horiek lortu ahal izateko, ezinbestekoa izan da Zaldu erreka bistaratzeko proiektua aurkeztea eta onarpena jasotzea; lan guzti horiek eginda daudenez, 2026an lanak lizitaziora aterako dira eta Anexuan 250 bat ibilgailurentzako aparkalekua egingo da”.
Urtza Alkortak aurrekontuen estrategikotasunean jarri du fokua, eta “anbiziotsuak” direla zehaztu du: “Aurrekontu anbiziotsuak dira, herritarren beharrizanetara egokituak. Ongizatea, aparkalekuak, mugikortasuna, azpiegiturak…herritarren kezkak jaso, beharrizanak zein diren ikusi eta lehentasunak argi dauzkagu. Proiektuetan ere inbertituko dugu, datozen urteetan azpiegitura berriak exekutatu ahal izateko”. Gainera, agintaldiko planari jarraituz egindako aurrekontuak direla gehitu du Alkortak: “Uste dut herritar gehienek ikusten dituzten beharrizan estrategikoekin bat egiten dutela aurrekontuek”.
Gainerako proiektuak. “Etorkizuneko Ondaroaren oinarriak jartzeko anbizioa daukate aurrekontuek”, zehaztu dute udaletik. Hala, 2026ko aurrekontuetan sartu dira ondorengo proiektuak: “Zeledonio Arriola eraikinaren proiektua idaztea (170.000 euro), Berdura Plazako proiektua egitea (udalak jasotako dirulaguntza bat baliatuz: 22.180 euro) eta frontoi estalia Zaldupe udal kiroldegiko kantxan integratzeko proiektuaren idazketa (100.000)”. Gainera, auditorioaren aurreproiektua ere kontratatuko dela jakinarazi dute, 20.000 eurotan. “Beti mahai gainean egon izan diren gaiak dira, eta bada garaia horiei kolpe egiteko. Bihar edo etzi azpiegitura berria izateko, beharrezkoa da proiektuak egitea. Eta lehenengo urrats hori emango dugu hainbat esparrutan. Behin horiek izanda, dirulaguntzak ere lor daiteke. Prozesu luzeak dira, baina azpiegitura berri guztiak hasi behar dira proiektuak idaztetik“.
Aipatutako proiektuez gain, herritarren ongizatea bermatzeko, beharrezko baliabide ekonomiko “guztiak” jarriko dituela azaldu du Alkortak, “batez ere herritar zaurgarrienen ongizaterako”: “Lea Artibai Mankomunitatearen esku daude gizarte zerbitzuak eta ingurumen arloa, beraz, horiek kudeatzeko1.805.230,72 euro bideratuko zaizkio. Horrez gain, lehen malako gizarte laguntzetarako beste 62.865,93 euro bideratuko dira eta ongizate arlotik beste 885.861,29 euro Artibai Egoitzara. Zaldupe udal kiroldegiak 646.199,27 euroko diru partida izango du, eta Zaldupe Eskolako barne arotzeria berrizteko 90.000 euro bideratuko dira”. Horrez gain, Udaltzainen bulegoa Arrantza Eskola izan zenaren beheko solairura lekualdatuko da, “bulego erosoagoa, funtzionalagoa eta irisgarriagoa izateko, herritarrei arreta zerbitzu hobeago bat emateko”. Proiektu honetara 50.000 euro bideratuko dira. Aitzol Osa udaltzainburuak azpiegitura berrien “beharrezkotasuna” azpimarratu du: “Herritarren beharrizanak asko areagotu eta aldatu dira azken urteetan, batez ere Udaltzaingotik askoz zerbitzu gehiago eskaintzen ditugulako. Azpiegitura berria beharrezkoa da izan nahi dugun udaltzain ere hori lortzeko bidean”.
Beste diru partida garrantzitsu batzuk ere zerrendatu ditu Ondarroako Udalak: aukera berdintasuna (190.204 euro), bide publikoen zolaketa (149.228,76 euro), euskararen sustapena (122.580 euro), herribusa (97.020,81 euro), Unanue Udal Musika Eskola (369.962,07 euro), Errebala Txikiñe gaztelekua (28.202,89), Txomin Agirre udal liburutegia (44.715,41), gazte ekintzak (59.251,86), enpleguaren sustapena (10.197 euro), enpresen garapena (51.001,44 euro, LeaArtibai Fundazioari), merkataritza (27.102 euro), Andra Mari jaiak (180.259,14 euro), ingurumenaren babesa eta hobekuntza (70.291 euro). Horrez gain, udaltzainen ibilgailuan ipintzeko desfibrilatzailea ere erosiko du udalak (1.200 euro), “edozein larrialdiren aurrean herriko edozein puntutara eramateko”.
Larruskaingo lursaila. Bestalde, herritarrek kontsumitu eta erabiltzen duten lurraren kalitatea bermatzeko, Larruskaingo (Markina-Xemein eta Etxebarria) lursail bat erosiko du Ondarroako Udalak, bertan dagoelako Ondarroara doan uraren iturburua. “43.000 euroko inbertsioa izango da, eta guztira 114.667 metro karratu erosiko dira. Artibai ibaiaren eta bere errekastoen kontserbazioan garrantzi handia dauka, eta Ondarroan edaten dugun ura kalitatezkoa izango dela merkatzeko eta Lea-Artibai eskualdean bertoko basoaren aldeko apustua egin nahi dugulako erosiko dugu Larruskaingo lursaila”. Urriaren 23ko udalbatzan begi onez ikusi duten bi udal taldeek lursaila erostearen ideia: “Lurgaia fundazioaren bitartez egingo dugu kudeaketa eta dirulaguntzen bidez inbertsio zati handi bat berreskuratu ahal izango da”.
Plangintza estrategikoak, bideorri. “Agintaldiko helburuak ez dira bakarrik inbertsioak, baita plangintza estrategikoak ere, Ondarroa etorkizun hurbileko erronketarako prest ipiniko dutenak. Horrez erakusgarri dira 2026an ere lanketarako tresna izango diren ekonomia urdinari lotutako Circular Seas proiektuaren baitako poruaren eraberritze eta suspertze plana, eskualde mailan egiten ari den turismo estrategia edota Fundazioaren bitartez egiten ari diren merkataritza biziberritzeko plana, besteak beste, Ondarroan zentratuko dena”, adierazi du Urtza Alkortak.
Hala, alkateak zehaztu duenez, oinarrizko urratsak ematen dabiltza agintaldi honetan: “Kamiñazpiko igogailu publikoa eta ikasgela berria amaitzear daude, futbol zelaiko aldagelak, terrazen ordenantza, kiroldegian gimnasio berria egitea, hiri mugikortasun plana, Portu Zuzendaritzarekin hitzarmena, Arrigorri ostatuaren inguruko hausnarketa prozesua, Etxelilako zerbitzu berriak… ildo beretik jarraituko du aurtengoak ere, lau urteko plana betez“.
