Marokoko dunetan barrena, Lea-Artibaiko lau lagunek Maroc Challengea amaitzea lortu dute
Sei etapako lasterketa gogorrean murgildu dira Kepa Gandiaga, Goratz Sololuze eta Jon Onagoitia markina-xemeindarrak eta Koldo Goikoetxea aulestiarra. Esperientzia "polita eta atsegina" izan den arren, zenbait oztopo ere izan dituzte.
Kepa Gandiaga, Goratz Sololuze eta Jon Onagoitia markina-xemeindarrak eta Koldo Goikoetxea aulestiarra, Maroco Challengean.Maroco Challenge Sahara eta Atlasaren arteko bide zakarretan barrena, abentura eta erronka uztartzen dituen Maroc Challenge rally-raid ospetsuan parte hartu dute Lea-Artibaiko lau lagunek. Sei etapako lasterketa gogorrean murgildu dira Kepa Gandiaga, Goratz Sololuze eta Jon Onagoitia markina-xemeindarrak, eta Koldo Goikoetxea aulestiarra. Bi taldetan banatuta —Gandiaga eta Sololuze alde batetik, eta Onagoitia eta Goikoetxea, bestetik—, azaroaren 29tik abenduaren 6ra eta sei etapatan banatuta, Marokoko hainbat eremu zeharkatu dituzte.
Onagoitiak nabarmendu duenez, lehen aldiz parte hartu du proban; Goikoetxearentzat, ostera, bigarren aldia izan da, eta lehenengo aldian amaitu ez izanaren arantza ateratzera joan da. Autoan beharrezko aldaketak eginda abiatu ziren Marokora, eta han trabaren bat edo beste izan dituzten arren, lasterketa amaitzea lortu dute: “Espero baino errazagoa izan da guretzat, ze, nahikoa zorte eduki dugu eta kotxeak ez digu hutsik egin. Erradiadorean arazo bat eduki genuen egun batean, eta beste batean, izotz-kontrakoa galtzen hasi genuen etapa. Hala ere, lortu genuen sailkapenerako beharrezko puntuak lortzea”.
Laugarren etapatik aurrera, esaterako, zenbait dunatan bide alternatiboak hartu behar izan zituzten autoaren altuera zela eta. Hala ere, helburua betetzea lortu zuten, eta helmugara heldu ziren euren mailan bigarren postuan amaituz: “Esperientzia oso-oso polita eta atsegina izan da; laurok lortu dugu gainera lasterketa amaitzea, eta ez da gutxi. Etxera itzultzeko egin ditugun 1.700 kilometroak izan dira gogorrenak, zalantzarik barik”.
Basamortuan, aurrera. Sololuzek eta Gandiagak “egun gogorrak” eduki zituzten hasieran, baina pixkanaka egoera irauli, eta aurrera egitea lortu zuten: “Lehenengo bi etapak nahikotxo kostatu zitzaizkigun, ze, gurpilak zulatu zitzaizkigun eta jantak puskatu. Hirugarren egunean tarte luzea geneukan aurretik, bi zatitan banatuta, eta basamortuan ibili ginen. Guretzat gogorra izan zen egun hura, ze, duna batean kotxea apurtu genuen. Hala ere, basamortu erdian konpontzea lortu genuen”. Hala, hurrengo bi etapak egitea lortu, eta lasterketa aho-zapore onagaz amaitu dute: “Eboluzioa oso ondo joan da. Bosgarren etapan erritmoa hartuta geneukan, eta oso ondo ibili ginen. Seigarrena nabigaziokoa zen, eta oso-oso ondo egin genuen. Oso ondo pasatu dugu, eta merezi izan du parte hartzea”.
Gaineratu dutenez, sariari baino, bizipen pertsonalei eman diete garrantza: “Gure kasuan, irabazi duguna ez da sari bat izan. Alde batetik, Mano de Africa elkartearekin lanean aritu gara, eta 30 kilo erropa eta eskolako zenbait material eroan ditugu bertara, eta esperientzia hunkigarria izanda. Bestetik, bertan motor munduaren afizionatua den jende asko ezagutu dugu, beti laguntzeko prest daudenak, eta horrekin geratzen gara”.
