500 ikusle baino gehiago elkartu ditu Markina-Xemeingo Magia Galak
Aurreikuspen denak gainditu ditu Magiaren Galak. Balorazio "oso positiboa" egin dute antolatzaileek, bai ikusle kopuruari dagokionez eta baita magoek eskainitako ikuskizunari dagokionez ere.
Magia Galan parte hartu zuten magoak. Ilusioak eta harridurak bat egin zuten zapatuan [urtarrilak 3] Markina-Xemeingo Uni frontoian, eta magiaz inoiz baino gertuago gozatzeko aukera eduki zuten herritarrek. Oier Jurado herriko magoak antolatuta eta Markina-Xemeingo Udalaren laguntzarekin, maila goreneko magoek parte hartu zuten Magia Galan, 500 ikusle baino gehiagoren aurrean.
Jurado pozik agertu da galak izan duen erantzunagaz, eta ikusle aldetik eduki duen harrera bikaina azpimarratu du: “Ikusle kopuruari dagokionez, 200 lagun inguru ziur espero genituen, 300 lagun, ondo joanda, eta 400, oso positibotzat jota. Ateak zabaldu aurretik ilarak Karmengo iturritik gora egiten zuen, eta azkenerako 530 ikusle sartu ziren Uni frontoian. Beraz, erantzunarekin oso-oso pozik gaude, aurreikuspen denak gaindituta”.
Uni frontoia bete zuten ikusleek Magia Galan.
Magoen maila ere, sekulakoa izan zela adierazi du: “Artista denek oso-oso ondo egin zuten, eta ikusleak oso gustura irten ziren emanalditik. Jendea ez dago ohituta halako ordu batean mago ugari ikustera, eta sekulakoa izan zen. Bakoitzak bere tartea egin zuen, eta magia mota desberdinak ikusteko aukera egon zen. Asko gustatu zen, eta izugarrizko txalo zaparradak egon ziren”. Gainera, ezusteko batzuk ere egon ziren tartean: “Nire anaia, Unai Jurado, lehenengoz magia egitera atera zen, eta Eneko Gutierrezek bere lagun Fernando de Rozas donostiarra ere gonbidatu zuen oholtzara, magia komikoa egitera berarekin”. Horiekin batera, Eleder Iglesias, Maria Arandia eta Carlos Alarcon Carlitos aritu ziren magia egiten.
Ekitaldiaren balorazio “oso-oso positiboa” egin du Juradok, eta bigarren aldi bat egiten saiatuko direla adierazi du: “Oso gustura gaude emaitzarekin. Oso ondo atera zen dena, eta ikusita zer nolako harrera eduki duen, saiatuko gara bigarren bat antolatzen ere”. Juradok eskerrak eman dizkie parte hartzaile denei, eta baita ikusle denei ere: “Amaitu genuenean argazkiak ateratzen eta sinadurak egiten ibili ginen, eta sekula ez dut horrenbeste denbora igaro horretan. Sekulako babesa sumatu genuen”.
Oier eta Unai Jurado anaiak, emanaldia amaituta.
