Lur Lejardik eta Maia Goikoetxeak emakumezkoen Jai Alai Ligako lehen txapelketa irabazi dute: Berriatuko Master Seriesa. Gizonezkoen finalak Aritz Erkiagaren eta Aratz Goikoetxearen aldera jo du.
Maia eta Aratz Goikoetxea neba-arreba berriatuarrek herriko txapelketa nagusiaren, Berriatuko Master Seriesaren, finalera iristea lortu zuten, eta iragan barikuan [urtarrilak 9] garaileei dagozkien txapelak jantzi zituzten Mendibarrenen. Lehenak Lur Lejardi markina-xemeindarragaz batera lortu zuen emakumezkoen Jai Alai Ligaren estreinako txapelketako garaipena; bigarrenak, aldiz, bere ohiko mailara itzuli dela dirudien Aritz Erkiaga ispastertarragaz batera. Final ederrez gozatu ahal izan zuten pilotalekuko harmailak beste behin sutan ipini zituzten ikusleek. Ederra ez ezik, hunkigarria izan zen lehiaketaren azkenengo jardunaldia: zortzi puntistek lazo beltza kantxaratu zuten, iragan astean ezustean zendun zen Iñigo Mantzizidor Mazo berriatuarraren gomutan.
Argazkiak: Eraman Jai Alai.
Emakumezkoen finalak lehia fratrizidaren antza eduki zuen. Izan ere, Lur Lejardik bere ahizpa Arairen kontra neurtu behar izan zituen indarrak, azken hura Ihart Arakistain sopeloztarragaz batera. Iazko txapelen defendatzaileek beren garaipena berresteko asmoz heldu zioten partiduari, eta gauzak oso gaitz jarri zizkieten arerioei lehen tantoetan. Lejarditarretako nagusienak eta Arakistainek finalaren lehen txanpa kontrolpean eduki zuten, aurkarien hutsegiteak tarteko; 2 eta 7, 4 eta 8, 5 eta 10 edota 6 eta 11 aurretik aritu ziren hautagai nagusiak. Gogor saiatuagatik ere, koska bat beherago aritu ziren Lur eta Goikoetxea. 8 eta 15ekoagaz nagusitu ziren lehenengo setean, segurtasun sentsazioz, Arai eta Arakistain.
Bigarrena hasi bezain pronto, baina, Lurrek erasora jo zuen, eta partiduaren haizeak bestelako noranzkoa hartu zuen. Markina-xemeindarretan gazteenak tanto biribilak oparitu zizkien zestazaleei, bere ahizpa jokotik ahal bezainbeste ateraz eta ardura Arakistainen lepotan jarriz. Goikoetxeak, bere aldetik, alde fisikotik eraso egin zien lehiakideei, pilotakadak kantxan ahalik eta gehien atzeratuz. Beren taldelanak ordainsari handia eduki zuen: 15 eta 13 gailendu ziren.
Argazkiak: Eraman Jai Alai.
Hirugarren eta azken setean, marroiak 4 eta 0 aurretik joatera iritsi ziren ziztu bizian. Bikote horiak, tanto bat eginez, aldeak apaltzeko saiakera egin zuen, baina ez zuten lortu egoera iraultzerik. Azken tantoan, Lurrek airez erantzun zion sopelarraren sakeari, dejada eder bat txapa gainean uzteko, eta partidua patrikaratuz. 5 eta 1 nagusituta, ligako lehen 1.000 puntuek Lurren eta Goikoetxearen poltsikora jo zuten; galtzaileek, behintzat, 600 puntuko uzta batu ahal izan zuten.
Lur Lejardi: “Lehen setean konfiantza barik ibili naiz, baina bigarrenean ulertu dugu jokoa aurrean oinarritu behar zela, Arairen eskumakadak atzealdean saihestu ahal izateko”
Txapela eskuetan, Lurrek lehen setean “sentsazio txarrekin” ibili zela adierazi zuen: “Lehen setean konfiantza barik ibili naiz, baina bigarrenean ulertu dugu jokoa aurrean oinarritu behar zela, Arairen eskumakadak atzealdean saihestu ahal izateko”. Goikoetxeak Arairen “errebotea behartzea” bilatu zuen: “Atzean mantendu zedila saiatu gara, bere errebotea behartzen eta deseroso joka zezala bilatzen”.
Aurrelarien jokoa.
Gizonezkoen finalean ere, goi mailako jokoa nabarmendu zen. Erkiaga beteranoak eta 16 urteko Goikoetxeak sasoi bete-betean dagoen —eta Eusko Label Winter Seriesean hori frogatzen ari diren— puntistak eduki zituzten aurrez aurre: Eñaut Urreisti mutrikuarra eta Unai Lekerika gernika-lumotarra. Aurrelariek, lehen unetik, edonor ahobete hortz uzteko moduko tantoak zukutu zizkioten jokoari, eta atzelariek piloteo handiko partidua jokatu zuten. Aipagarria izan zen etxeko izar gaztearen jarrera: Goikoetxeak ederto kudeatu zuen presioa, akats gutxi egin zituen, eta pilotakada zailak eroan.
Argazkiak: Eraman Jai Alai.
Hiruna, launa, hamarna, hamaikana, hamabina, hamahiruna eta hamalauna berdindu ondoren, azken tantoan erabaki zuten lehen seta. Gogoangarria izan zen. Jokaldia Lekerikak burutuko zuela zirudien hasieran, Erkiagak gero, Urreistik hurrena, eta azkenean Ispasterko magoak frogatu zuen lehengo lepotik duela burua. Pilota frontoiaren saretik bertatik eroan ostean, handik gutxira, Erkiaga gai izan zen zabaletara errebote bat behartzeko, eta 15 eta 14koa ezarri zuen lehen setaren hondarrean.
Lehen setaren inertziek bere horretan jarraitu zuten, bigarrenari ekin ziotenean. Marroiak, konfiantzaz gainezka, 8 eta 4 aurreratu ziren, baita 10 eta 5 edota 11 eta 7 ere. Horiak, baina, ez zeuden finalean amore emateko prest. Urreistiren defentsa lanak fruitua eman zuen, eta 11 eta 10era hurreratu ziren. Aurkariak estu hartu zituzten mutrikuarrak eta gernika-lumotarrak, 13 eta 12, baina beren esfortzua apur bat kamuts geratu zen, bikote marroiaren segurtasunaren aurrean: 15 eta 13koagaz eskuratu zuten seta Erkiagak eta Goikoetxeak.
Argazkiak: Eraman Jai Alai.
Mendibarrenera iritsi orduko, ispastertarrak sei partidu zeramatzan jarraian, garaipenaren eztirik dastatu ezinik. Berriatuan eta Gernika-Lumon, baina, hiru irabazi ditu erreskadan. Erkiaga sentsazio onen bidezidorrean dago berriro. Goikoetxearentzat, ostera, ikasgai handia izan da bere jaioterrikoa, lehiakide profesionalen artean egin duen estreinako agerraldia. Lekerikari, sikiera, ligaren behin-behineko lider postura heltzeko balio izan zion finalean lortutako emariak. Atzelariak 3.100 puntu ditu, bere herrikide Xabier Barandikaren eta Urreistiren aurretik.
Aratz Goikoetxea: “Goikoetxeak urduritasuna kontrolpean edukitzen eta joko egokia egiten asmatu du; final polita izan da”
Hain zuzen, kantxaratu orduko, “urduritasunak janda” ibili zela azpimarratu zuen Goikoetxeak: “Tentsio horrek lehen setean hutsegite batzuk edukitzera eroan nau, baina apurka-apurka buelta ematen joan naiz, Erkiagaren laguntzarekin; bere gidalerroak jarraitu ditu uneoro, eta bidea egin dute. Aurrerantzean goi mailako aukera gehiago edukitzea espero dut”. Bere bikotekideak arerioen maila goraipatu zuen: “Urreistik eta Lekerikak partidu piloteatua eta gogorra plazaratu dute, baina Goikoetxeak urduritasuna kontrolpean edukitzen eta joko egokia egiten asmatu du; final polita izan da”.
Argazkiak: Eraman Jai Alai. 
