Ispasterko frontoia estaltzeko lanak erritmo onean doaz eta ekainean amaitzea aurreikusten da
621.666 euroko inbertsioarekin, proiektuak frontoia urte osoan erabilgarri egongo den kirol eta gizarte gune bihurtuko du.
Ispasterko kanpoko udal frontoia estaltzeko lanak erritmo onean aurrera doaz eta, Udalaren aurreikuspenen arabera, ekainean amaitu ahal izango dira. Zazpi hilabeteko exekuzio epea duen proiektuak 621.666,87 euroko aurrekontua du guztira, eta horietatik 136.278 euro Bizkaiko Foru Aldundiako Euskara, Kultura eta Kirol Sailak diruz lagundu ditu.
Esku-hartzeak ez du soilik frontoia estaltzea aurreikusten, baizik eta Elexalde auzoko ingurunea egokitzea eta antolatzea ere. Helburu nagusia frontoia estaltzea da, urte osoan zehar erabilera bermatzeko, eta aldi berean eremu publikoaren antolamendua eta haren lotura hobetzea, elizaren perimetroa eta ostalaritza-establezimenduarekiko harremana errespetatuz.
Gogorarazi behar da lizitazioa baino urtebete lehenago, 2024an, eraldaketa honetarako ideia-lehiaketa bat egin zela, eta gaur egun gauzatzen ari den proiektua lehiaketa hartako proposamen irabazlean oinarritzen dela.
Proiektuak egur laminatuzko sistema estruktural industrializatua aurreikusten du, sekzio zirkularreko bost zutabe nagusitan bermatua eta zapata jarraituen eta mikropiloteen bidezko zimendatze konbinatuarekin. Estalki nagusiak 512,20 metro koadro hartuko ditu; horri 140 metro koadroko ataria eta 142,30 metro koadroko espazio publiko zoladuna gehituta, guztira 794,50 metro koadroko esku-hartzea osatuko da.
Diseinuak euskal tipologia tradizionaletan inspiratutako habe handi bat txertatzen du, lehendik zegoen frontoi-horman neurri batean bermatua; horma hori aurrez aztertu da haren gaitasun erresistentea bermatzeko. Alboko alde irekietan panel sandwich bidezko itxitura arinak eta bernizatutako pinu-zurezko arotzeria triangeluarrak jarriko dira, multzoaren irudi garaikidea indartuz.
Bestalde, proiektuak frontoiaren, jatetxearen eta bide publikoaren arteko trantsizioa konpontzen du, hormigoi fratasa-zoladura jarraituekin eta Ereñoko harrobietako harria eta marmol-piezak masan integratuta erabiliz. Era berean, banku lineal bat jarriko da espazioaren ertza antolatzeko eta dauden maldekiko lotura errazteko.
Esku-hartzeak, halaber, euri-uren sarea berritzea, inguruan dagoen berokuntza zentraleko sarera egokitzea eta behe-tentsioko instalazio elektriko berria jartzea aurreikusten du, LED teknologiaren bidez energia-eraginkortasuna sustatuz.
