Asteon hasiko da Munitibar Rookies Series
Munitibar Rookies Series, martxotik ekainera arteko zesta-punta txapelketa herrikoia, zapatu honetan [martxoak 14] abiatuko dute. Hogeina aurrelarik eta atzelarik izena eman dute hiru fase edukiko dituen lehiaketara.
Munitibarko udal pilotalekuak hitzordu berezia hartuko du martxotik ekainera arteko zapatuetan: Munitibar Rookies Series txapelketa. 18 eta 25 urte bitarteko federatutako puntistei zuzendutako txapelketa izango da, kiniela formatuduna, eta zapatu honetan [martxoak 14] ipiniko dute abian. Hogeina aurrelarik eta atzelarik izena eman dute, egitasmoaren estreinaldian.
Lehen fasea, martxoan nahiz apirilean jokatuko dute: martxoaren 15, 22 eta 29an eta apirilaren 12, 19 eta 26an. A multzoko norgehiagokak 11:00etan hasiko dira, eta B multzokoek emango diete jarraipena, 12:30ean. Bigarren fasea maiatzean jokatuko dute: 9, 16, 23 eta 30ean. Azken txanpa ekainean ailegatuko da: 6an eta 13an final-laurdenak lehiatuko dituzte, 17:00etan eta 18:30ean; 20an, finalaurrekoak, 17:00etan eta 18:00retan; finalak ekainaren 27an izango dira, oraindik zehaztu gabeko ordutegian. Lehen bi faseak, aipatu modura, kiniela formatukoak izango dira, baina finalek partidu formatua edukiko dute. Gainera, erlojuaren kontrako kinielak izango direla argitu dute: lehen faseko neurketa bakoitzak ordu laurdeneko iraupena edukiko du, eta bigarren fasekoek, ostera, hogei minutukoa.
Zesta-puntaren jarraitzaileek erantzun aparta eman diote txapelketaren lehen ekitaldiari, pilotari kopurua “oso handia” baita. Hain zuzen, antolatzaileek lehen asmoa puntista denak elkarren kontra jokatzeko nahastea zen, baina azkenean hori “ez da posible izan”. Horrenbestez, egin duten zozketan aurrelari zein atzelari bakoitzak zenbaki bat dakarren bola bat hartu du; bertan zehaztu zaizkie beren partiduaren data eta hastapen ordua. Zenbaki horrek “lehen fase osorako” balioko die.
Beraz, pilotari bakoitzak hiru egun desberdinetan jokatzeko aukera edukiko du, eta horietako bakoitzean ordu laurdeneko bost kinielatan ariko da, bikotekide desberdinekin. Lehendabizikoa jokatu ondoren, aurrelariek beherazko ordenagaz txandakatuko dira, eta atzelariak, aldiz, goranzkoagaz, bost kinielak jokatu arte. Lehen fasea pilotari bakoitzaren puntu kopuruak biribilduko du, eta gehien bildu dituzten hamar aurrelari zein atzelariek aurrera egingo dute. Kiniela bakoitzeak jasotako puntuei, halaber, sari erantsia gehituko zaie: kiielaren irabazleak sei tanto jasoko ditu; bigarrenak, hiru.
Bigarren fasea hasi orduko, bigarren zozketa egingo dute, eta parte hartzaile bakoitzak berriro atera beharko du fase osorako baliagarria izango zaion zenbakidun bola. Berriz puntuazio pilaketa eginda, zortzi aurrelari eta atzelari onenek egingo dute final-laurdenekoetarako bidea. Hirugarren eta azken fasean, zortzi tantoz osaturiko setetara jokatuko dituzte partiduak, eta horietako hiru lortu beharko dira, neurketa irabazteko. Bikoteen eratzeari dagokionez, bigarren faseak lagatako puntuazioaren arabera osatuko dituzte: puntu gehien lortutako aurrelariak puntu gehien duen atzelariagaz bat egingo du.
Denetariko helburuak.
Hainbat dira antolakuntzak txapelketa horregaz lortu gura dituen jomugak: alde batetik, pilotariei denbora tarte horretan partiduak jokatzeko “beste txapelketa bat” ahalbideratzea; bestetik, “datozen pilotarien” plaza izatea, belaunaldi berriei “ikusgarritasuna” emanez; horiez gain, puntistak kiniela formatuan jokatzera doitu daiezen “laguntzea” ere bilatuko dute, Munitibarko udalerrira “bisitariak erakartzeaz” eta doako kirol nahiz kultur eskaintza “sustatzeaz” gain.
