Euskal Herriko Torturatuen Sareak informazio gunea jarriko du Ondarroan
Euskal Herriko Torturatuen Sareak martxoaren 12tik 16ra eta apirilaren 9an laguntza eskainiko du Antiguako Ama kalean.
Euskal Herriko Torturatuen Sareak informazio gune bat jarriko du martxan Ondarroan, torturatuak izan diren herritarrei laguntza eskaintzeko. Informazio gunea Antiguako Ama kalean egongo da, lehen Foto Antonio denda zena izan zen lokalean.
Ekimenaren bidez, sareak herritarren laguntza eskatu du listatutako izenak ezagutzeko eta pertsona horietara iristeko, ahal den neurrian torturatutako pertsona gehiagorengana heltzeko helburuarekin.
Informazio gunea martxoaren 12tik 16ra egongo da zabalik, eta berriro apirilaren 9an ere bertaratzeko aukera izango da. Ordutegia 18:30etik 20:00etara izango da.
Antolatzaileek azaldu dutenez, ekimen honen berri Kofradian hilaren 6an egindako aurkezpenean eman zuten, eta orain herritarren laguntza eskatu dute prozesuan parte hartzeko.
Horregatik, herritarrei dei egin diete martxoaren 12an 18:30etik 20:00etara informazio gunera gerturatzeko, Zalantza Argitu karpeten inguruko informazioa jasotzeko edo banaketa eta bilketan laguntzeko.
