Ahoztar Zelaietak El Pradalismo liburua aurkeztuko du Lekeition eguenean
EAJren barne botere egiturak eta JoBuBi gazteen gainbehera aztertzen dituen lana izango da hizpide Azkue aretoan.
Ahoztar Zelaieta kazetari eta idazleak El Pradalismo El ocaso de los JoBuBi liburua aurkeztuko du Lekeition datorren eguenean [apitilak 23], 19:00etan. Ekitaldia Kultur Etxeko Azkue aretoan izango da, eta bertan egileak berak azalduko ditu bere lanaren gako nagusiak.
Liburuak azken urteetako euskal politikaren bilakaera du ardatz, bereziki Eusko Jaurlaritzaren gidaritzan izandako aldaketa. 2024ko ekainean, Iñigo Urkulluren hamarkada bat baino gehiagoko agintaldiaren ondoren, askorentzat ezezaguna zen aurpegi batek hartu zuen lekukoa: Imanol Pradalesek. Testuinguru horretan kokatzen du Zelaietak “pradalismoa” deitzen duen fenomenoa.
Egilearen arabera, belaunaldi aldaketa horrek EAJren barne egituretan eragin sakona izan du, alderdiaren aparatua astinduz eta boterearen banaketan aldaketak eraginez. Liburuan azpimarratzen denez, euskayetanoen eta soziologoen klanak funtsezkoak izan dira egungo erakunde-sarea eratzeko eta alderdi barruko boterea berrantolatzeko.
Halaber, lanak Bizkaiko Burukide Gazteen (JoBuBi) gainbeherari ere erreparatzen dio, fenomeno hori eta lidergo aldaketa testuinguru berean kokatuz. Zelaietak azaltzen duenez, bi prozesuek lotura estua dute eta elkar ulertzeko giltza eskaintzen dute.
Egileak berak “gida” modura definitzen du liburua, EAJko iturgintzako taldeen arteko botere-kuoten banaketa ulertzeko tresna gisa. Horrez gain, aldaketa horiek erakundeetan eta euskal gizartean izan ditzaketen ondorioak aztertzen saiatzen da.
Aurkezpenean, beraz, aukera izango da egilearekin solasean aritzeko eta gaur egungo euskal politikaren barrunbeak hobeto ezagutzeko. Ekitaldia irekia izango da, eta interesa duten herritar guztiak gonbidatuta daude bertaratzera.
