Zesta-punta eskolen topaketa egin dute Markina-Xemeinen
Zesta-puntaren etorkizunaren erakusgarri izan ziren joan den zapatuan [apirilak 25 ] 125 haur. Asteburu honetan ere berriro batuko dira Bidarten egingo den eskolen topaketa handian.
Markina-Xemeingo Uni frontoian batu ziren zesta eskoletako gazteakMarkina-Xemeingo Zesta-Punta Eskola Urte luzez egin duten bezala, Euskal Herriko zesta-punta eskolen topaketa egin zuten joan den zapatuan [apirilak 25]. Markina-Xemeinen batu ziren hainbat herritako eskoletako umeak, eta elkar ezagutzeko eta sarea handitzeko aukera bikaina izan zuten. Eskolarteko topaketan, benjaminen, haurren eta kimuen kategorietako umeak izan ziren protagonista.
125 haur batu ziren guztira. Kategorietan banatuta, Markina-Xemeingo Uni frontoian, herriko frontoi txikian, Barinagako frontoian eta Etxebarrian jokatu zituzten zenbait partida. Benjaminak Markina-Xemeingo eta Barinagako frontoi txikietan batu ziren, kimuak Etxebarrian eta haurrak Markina-Xemeingo Uni frontoian batu eta sei kiniela jokatu zituzten frontoi bakoitzean. Partiden ostean, 300 lagunetik gora batu ziren Plazabarripean, eta honen ostean, eguna gogoratzeko balio izango duen argazkia atera zuten.
Ume, guraso eta eskoletako irakasleak oso pozik agertu dira zapatuko egunarekin. “Giro oso ona” sortu zela adierazi dute, eta honelako egunek duten garrantzia eta helburua azpimarratu dute: “Topaketen helburua umeek lagun berriak egitea eta frontoi berrietan jokatzeko aukera ematea da. Honetaz gain, zesta-punta bultzatzea da helburu nagusia”.
Asteburu honetan ere berriro batuko dira Bidarten egingo den eskolen topaketa handian. Jende asko batuko dela aurreikusten dute, izan ere, iparraldeko eskoletako ume asko etortzen dira bertara. Markina-Xemeingo eskolatik ere, bertara joango dira zesta-punta bultzatzera eta saretzen jarraitzera.
