Tecnaliak eta Aztik aliantza sinatu dute, nekazaritzako elikaduraren eta ekonomia urdinaren erronkei erantzuteko
Aztik eta Tecnaliak sinatutako epe luzeko hitzarmen estrategikoak industriaren digitalizazioa, AA, elikadura-sistema jasangarriak, blue food eta bioekonomia uztartzen ditu, eta helburu du elkarrekin negozio-unitate bat sortzea, teknologia merkatura azkarrago transferitzeko.
Azti eta Tecnaliako zuzendaritza, gaur (maiatzak 27), hitzamena sinatzeko.Azti / Tecnalia Nekazaritzako elikagaien industriaren eta ekonomia urdinaren erronkei elkarrekin erantzuteko asmoz, “ibilbide luzeko aliantza estrategikoa” sinatu dute gaur (maiatzak 17) Tecnaliak eta Aztik —biak ala biak Basque Research & Technology Allianceko (BRTA) kideak—, Food4Futuren. Hitzarmen hori Aliantzak Proiektu Estrategikoaren parte da, zeina 2026ko Kudeaketa Planaren eta AZTI2030en oinarrietako bat den, baita Tecnaliaren eta Aztiren Plan Estrategikoena ere. Gainera, ziurtatu dute Euskadiko Gastronomia eta Elikaduraren Plan Estrategikoa 2030ek dituen helburuekin lerrokatzen dela, berrikuntza teknologikoari, nazioarteko hedapenari eta enpresen arteko lankidetzari dagokionez.
Hitzarmearen bidez, elikaduraren eta ekonomia urdinaren balio-kate osorako plataforma komun batean gaitasun zientifikoak eta baliabide teknologikoak optimizatzeko konpromisoa hartu dute biek: “Hitzarmenak onura nabarmenak ekarriko dizkie enpresei, kontsumitzaileei, gizarteari eta ingurune naturalari”. Izan ere, hitzarmenak zenbait gaitasun osagarri uztartzen ditu: batetik, industriaren digitalizazioa, AA eta bioteknologia, eta, bestetik, elikadura-sistema jasangarriak, blue-food-a eta bioekonomia. Horrez gain, aliantzak negozio-unitate bat sortzea ere aurreikusten du, teknologia merkatura azkarrago transferitzeko.
“Aliantza hau ez da akordio puntual bat: lan egiteko modu berri bat da”, azaldu du Rogelio Pozo Aztiko zuzendari nagusiak. “Hitzarmen honek ez du gure identitatea lausotzen; aitzitik, argiago definitzen du. Tecnaliaren gaitasun digitalak eta bioteknologia industrialekoak guk itsas zientzian eta elikaduran egin dugun ibilbidearen osagarri dira, eta, haiei esker, proposamen osoagoak, lantalde zabalagoak eta erantzun-denbora laburragoak eskaini ahalko diezaiekegu enpresei”, adierazi du gaurko ekitaldian. Eta, gehitu du “elkarrekin negozio-unitate bat eraikitzeko” helburu hori aliantza hau merkatura iritsiko dela bermatzeko modurik onena dela.
Tecnaliako zuzendari nagusi Jesus Valerok azpimarratu du aliantzak “industriarako lehiakortasun tresna” izatea duela helburu: “Berrikuntza-prozesuak bizkortu, garapen teknologikoko denborak laburtu eta testuinguru gero eta zorrotzago eta aldakorrago bati erantzuteko gaitasuna hobetzeko aukera emango du”.
Hori dela eta, Tecnaliaren eta Aztiren diziplina anitzeko lantalde guztiei esker, nekazaritzako elikagaien sektoreko enpresei eta haien balio-kateari (osagaiak, packaginga, ondasunak eta zerbitzu osagarriak) soluzio integratu batzuk eskaini ahal izango dizkiete hurrengo arlo hauek konbinatuz: prozesatze- eta kontserbazio-teknologiak, osagai osasungarriak, kalitate-kontrolaren digitalizazioa eta kontsumitzailearen pertzepzioa.
Itsas baliabideen balorizazioa.
Hitzarmenak ekonomia urdineko ekimenak sustatzen ditu; adibidez, itsasoko azpiproduktuak balorizatzea eta bioteknologia urdina. Azken hori oinarri hauek dituen diziplina emergente bat da: bioprozesuak, hartzidura aurreratua eta itsas jatorriko elikagai funtzional berriak sortzea, betiere elikaduran, osasunean eta jasangarritasunean aplikazioak izan ditzaten.
Izan ere, ur-ekosistemak monitorizatu eta modu jasangarrian kudeatzeko, energia-efizientzia hobetzeko, itsasoko balio-katean hondakinak murriztu eta baliabide naturalak modu zehatzago eta jasangarriagoan kudeatzen laguntzen duten sistema adimendunak garatzeko lan egingo dute elkarrekin, soluzio digital aurreratuak —biki digitala, AA aplikatua eta sentsorika barne— garatuz.
Bien arteko aliantza Zuzendaritza Batzorde Bateratu batek, koordinaziorako organo eragile batek eta bi erakundeetako patronatuen ordezkaritza duen goi-mailako batzorde batek osatzen dute. Jakinarazi dutenez, Zuzendaritza Batzorde Bateratua hiru hilean behin elkartuko da, goi-mailako batzordea urtean behin, eta hitzarmenaren aurrerapenaren tarteko berrikuspen bat egingo da 18 hilabetera.
MoU dokumentuak aliantzaren eremu eta merkatuetan elkarri lehiarik ez egiteko berariazko itunak jasotzen ditu, eta eredua berariaz dago irekia beste bazkide osagarri batzuk sartzeko. Lehenengo mugarriak 2026an ikusiko dira, eta bi erakundeak lanean ari dira Europako deialdietan elkarrekin proposamen lehiakorrak egiteko, sektoreko foroetan modu koordinatuan egoteko eta teknologia-mapaketa komun bat egiteko.
