Dena dute prest mutrikuarrek Arnoko XX. Mendi Ibilaldirako
Burumendi Mendizale Elkarteak antolatuta, 22 kilometroko ibilbidea egingo dute domekan [ekainak 7].
Txurruka Plazan batuko dira Mutriku eta inguruetako mendigoizaleak XX. Arnoko Mendi Martxa egiteko. 08:00etan hasiko dute 22 kilometroko eta 969 metroko desnibel metatua duen ibilbidea, plazan hasi eta amaituko dena. Arnoko tontorrerako bidean, San Juan, Kalbaixo, Apain, Arnoko kurutzea, Arnoko aterpea, Ameikutz, Kostolamendi, Armentxa, Berrosasi, Santakutz, Pikupe, Galdona eta Santa Elenatik pasako dira ibiltariak. Amaitutakoan, LumaGorri oilasko errea jateko batuko dira parte hartzaile guztiak, Mutrikuko Saokatira Taldearen eskutik.
