Sormen lan kolektibo bat opari

Sentimenduaren plaza izan da gaur goizean [uztailak 4] Lekeitio. Moveo konpainiaren gidaritzapean, inoiz errepikatuko ez den sormen lana osatu dute plazara atera diren ikusleek. Mugimenduak aske egin ditu.

Larraitz Ibaibarriaga Etxaburu

Lekeitio

2026/07/04

Agertoki ikusgarrietan ikusgarriena dauka Kaleka Kale Arteen Jaialdiak. Agertokirik sortzaileena, ikusleak modura. Moveo konpainiak sorkuntza-prozesuaren parte aktibo bihurtu ditu gaur [uztailak 4] Independentzia Plazan bildu diren adin guztietako herritarrak.

Guztien artean sortu dute musikaz, mugimenduz, dantzaz eta batez ere sentimenduz betetako ikuskizuna: Ballar Sol És Un Pal. Hasieran hotz, lotsati xamar, eta minutuek aurrera egin ahala, gero eta solteago. Ume, gazte eta heldu, horrela aritu dira, konpainiako artisten erritmoari jarraitu eta irudimenari ateak zabalduz. Bihotz taupaden erritmoari jarraituta, elkarrenganako konfiantza irabaziz, musika sentituz…. guztien artean sormen lan ederra osatu dute, itsaso zabalak besarkatuta.

Inguruan, adi-adi zeuden sorkuntza lana gertutik ezagutzera joan diren ikusleak. Plazara atera direnek eta ez direnek ere, sentimenduetan sakontzen duen esperientzian murgiltzeko aukera paregabea eduki dute. Bakarra. Gehiago errepikatuko ez dena.