Lujuak eta Estradak irabazi dute XVIII. San Migel Rallysprinta
56 taldek lehiatu zuten zapatuan [uztailak 4] Elgoibar eta Etxebarria batu zituen erlojupekoa; eskualdeko 30 parte hartzaile egon ziren.
XVIII. San Migel RallysprintaEME GT eskuderiako Xabier Lujuak eta Jesus Estradak irabazi zuten zapatuan [uztailak 4] XVIII. San Migel Rallysprinta, Alpine A110gaz.
56 taldek parte hartu zuten, hau da 112 pilotu-kopilotuk. Horietatik, emakumezko pilotu bi eta hamasei kopilotu egon ziren. Eskualdeko parte hartzaileei dagokienez, 30 parte hartzaile inguru izan dira. Emakumez osatutako klub aitzindari eta bakarra da EME, eta bertako kideak «pozik» daude rallysprintak izandako erantzungaz. Parte hartzaile kopuruagatik ez ezik, batik bat, boluntarioen lanagatik daude pozik.
Erlojupekoa Elgoibarren hasi eta Etxebarrian amaitu zen; pilotuek hiru aldiz egin zuten ibilbidea; guztira, 94,65 kilometro osatuz. Lujuak eta Estradak «erritmo bizia eta lehia handia» jarri zioten lasterketari, hiru igoaldietan nagusituz Alpine A110 “ikusgarriagaz”. Eguna buruz buru borrokan igaro zuten irabazleek, bigarren postua lortu zuten Aitzol Apalantza eta Aitzol Lejardigaz (Hyundai i2N Rally2). Hirugarren postua, aldiz, Gorka Antxustegi eta Jon Arrazola markina-xemeindarrentzat izan zen –eskualdeko lehenengo sailkatuak izan ziren–, Renault Clio Williamsgaz.
Sari banaketara bertaratu ziren Elgoibar, Etxebarria eta Markina-Xemeingo udal ordezkariak, baita Euskal Automobilismo Federazioko lehendakaria ere.
Antolatzaileak «oso pozik» daude, eta balorazio positiboa egiten dute. “Hasi ginenean zazpi emakume ginen, hamarrera ez ginen heltzen eta, gaur egun, 20ra heldu gara; zerrenda batzuetan, 30era ere bai. Eboluzio oso oso positiboa da. Gutxinaka, bagoaz”.
Antolakuntzatik aipatu dute ezustekoren bat egon bazen ere, “bizkor eta modu egokian” kudeatu zela. Gainera, haien esanetan, parte hartzaileen eta ikuslegoaren jarrera zuzena izan zen, eta inguruak eguna bukatzerako txukun utzi zituzten. Eskuderiako kideek aipamen berezia egin nahi izan diete beste behin proba aurrera eramateko boluntario aritu diren guztiei, eta datorren urtean erlojupekoa aurrera eramateko ahaleginean jarraituko dutela jakinarazi dute.
