Herritarrek aukeratuko dute San Antolin jaietako txupina nork botako duen
Domekara arte [uztailak 19], galdetegi baten bitartez adierazi beharko dute lekeitiarrek txupinazoa nork botatzea nahiko luketen.
Antero herritarrak agurtzen udaletxeko balkoitik. Lekeitioko Udalak bigarren urtez jarraian herritarren esku utziko du San Antolin jaietako txupinazoa nork botako duen erabakitzea. Ekimenaren helburua da jai herrikoien ezaugarri nagusiak indartzea: herritarren parte hartzea, auzolana eta bizipoza.
Prozesuak bi fase edukiko ditu. Lehenengoan, uztailaren 13tik 19ra bitartean, herritarrek nahi beste proposamen aurkeztu ahal izango dituzte, pertsona, talde edo herriko eragileen izenak proposatuz. Hautagaiak herriagaz edo jaiekin lotura izan beharko du, eta bere ibilbideagatik edo egindako ekarpenagatik aitortza merezi duen norbait edo taldea izan beharko da. Bereziki baloratuko dira kulturan, euskararen sustapenean, gizarte arloan, kirolean edo bestelako esparruetan egindako ekarpenak, baita euskara, genero ikuspegia eta herrikoitasuna bezalako balioak ere.
Behin proposamen guztiak jasota, udalak hiru hautagai aukeratuko ditu ezarritako irizpideen arabera. Hautatutako pertsona edo taldeekin harremanetan jarriko da aurrez, txupinazoa botatzeko prest daudela baieztatzeko.
Bigarren fasea uztailaren 22tik 31ra egingo da. Epe horretan, herritarrek hiru hautagaien artean bozkatu ahal izango dute. Pertsona bakoitzak boto bakarra eman ahal izango du, bai udalaren webgunean zein sare sozialen bidez eskuragarri egongo den galdetegi digitalaren bidez, bai Kultur Etxean jarriko den hautestontzian. Parte hartzeko ez da adin mugarik egongo, “San Antolin jaiak herritar guztienak direlako”.
