Eguenera arte egongo da zabalik Marmitako Txapelketan izena emateko epea
Atuna, 5 kilo patata, 2 kilo kipula, 3 piper eta ogi bakarragaz lehiatu beharko dira parte hartzaileak.
Aittitta Txiki Kultur Elkarteak antolatuta, 23. Marmitako Txapelketa egingo da zapatuan [uztailak 25] Lekeitioko plazan. Antolatzaileek gogorazi dute izena emateko azken eguna eguenean [uztailak 23] izango dela. Horretarako, galdetegi bat sortu dute –kartelean dagoen QRa eskaneatuta ere egin daiteke– eta izen emate orria bete beharko da. Behin izen ematea behar bezala eginda, baieztapen mezua jasoko dute parte hartzaileek.
Txapelketa arauekin dator. Arautegiaren arabera, marmitakoa herriko plazan bertan prestatu beharko da, eta kazola bakoitzak gutxienez zortzi lagunentzako izan beharko du. Antolakuntzak talde bakoitzari honako osagaiak emago dizkio: atuna, 5 kilo patata, 2 kilo kipula, 3 piper eta ogi barra bakarra. Produktuen banaketa 09:00etan egingo da, eta prestatutako marmitakoak 13:30erako aurkeztu beharko dira epaimahairen aurrean.
Parte hartzeko, 15 euro ordaindu beharko dira kazola bakoitzeko, eta ordainketa txapelketa egunean bertan egingo da, Independentzia plazan. Bestalde, plazan bazkaldu nahi duten kuadrillek 4 euro ordaindu beharko dituzte pertsonako. Horren truke, antolakuntzak mahaia –zortzi lagunentzakoa–, aulkiak, platerrak eta jateko tresnak jarriko ditu.
Zapatuan eguraldi txarra egingo balu, txapelketa herriko aterperen batean egingo litzatekeela jakinarazi du antolakuntzak. Aurrerago emango lituzkete xehetasun gehiago, hala izanez gero.
