Mutrikuko Gaztetxea omendu dute Malen jaietako Gazte Egunean
Gazte Egunarekin eman diote hasiera gaur [uztailak 21] Mutrikuko Malen jaiei. Aurtengo omendua Mutrikuko Gaztetxea izan da.
Gerizpean babesteko Beheko Plazako izkinak bete dituzte gaurkoan mutrikuarrek. Izan ere, eguraldi eguzkitsuarekin eman diote hasiera Malen jaietako Gazte Egunari. Gaurkoan [uztailak 21] txupinazoa bota bezain laster, Bizixo Jai Konpartsako gazteek mikroa hartu dute, aurtengo omendua zein izango den ozen esateko: “Aurten, zalantzarik gabe, Mutrikuko Gaztetxea aukeratu dugu. 25 urte pasatu dira lehenengo gazte talde batek herrian espazio libre eta autogestionatu baten aldeko apustua egin zuenetik. Gazteak antolatzeko modu bat eraiki zen, elkartzeko leku bat sortu zen, herriko gazteei ahotsa eta protagonismoa emateko tresna bat. 25 urte geroago, balore horrek bizirik diraute”. Aurten, Mutrikuko Gaztetxeak 25 urte bete dituenez, ibilbide guzti horretan egindakoa goraipatzeko eta balioan jartzeko egin diote gaurko omenaldia.
12:30erako eman diote hasiera egunari herriko gazteek, eguerdian egin duten bazkarirako mahai muntaketarekin. Ondoren, karropoteoarekin alaitu dituzte herriko kaleak, eta 14:30ean bota dute txupinazoa Bizixo Jai Konpartsako kideek. Suziriak eztanda eginaz batera igo dira oholtzara konpartsakideak: “Biziko Jai Konpartsatik hilabete luzez egitarau zabal, parte hartzailea eta alternatiboa antolatzen murgilduta egon gara. Gure helburua izan da Malen jaietan txosnagunea jai eta aldarrikapenerako gune bihurtzea”. Gainera, aipatu dute, azken urtean jende berria batu dela konpartsara, eta “berri pozgarria” dela: “Hori ikusita, gonbidapen zabala egin nahi diegu herritarrei, konpartsara batzeko. Izan ere, gaur hasi eta domekara arte gozatuko ditugun Malen jaiek atzetik lan asko dakarte, eta hori guztia posible egiteko beharrezkoa da gazteon antolakuntza”.
Gainera, bi gazteek aipamena egin diote atzo Malen jaietan erasorik ez! lelopean egindako elkarretaratzeari: “Atzo ozen aldarrikatu genuen Malen jaietan ez dugula inolako erasorik onartuko, eta gogor borrokatuko ditugula. Aurrean izango gaituzue!“.
Omendua, Mutrikuko Gaztetxea. Aipatu bezala, aurten, Mutrikuko Gaztetxea omendu du Bizixo Jai Konpartsak, gaztetxearen 25. urteurrenean. Horrez gain, azken denboraldian gaztetxeak jasaten ari diren “errepresioa” salatu dute: “Etxegabetzeak, isunak, mehatxuak eta kriminalizazio kanpainak bihurtu dira askotan gazte antolakuntzaren egunerokotasuna. Gaztetxeen kontra jotzen dute, herrian gazteok gure espazio propioak izateko eskubidearen kontra, eta gazteak modu aske baten antolatzeko daukaten eskubideen kontra. Horregatik, gaur hemendik argi esan nahi dugu: gaztetxea defendatzea herria defendatzea da. Gaztetxeak defendatzea guztion etorkizuna defendatzea da”.
Omenduari egindako hitzartzearen ondoren, argazkia atera dute guztiek, eta gero Egaña gunera joan dira bazkaltzera. Antolatzaileek zehaztu dutenez, aurten, 330 lagun batu dira bazkaritan, eta 500 lagun baino gehiagok erosi dute Gazte Eguneko kamiseta. Bazkalostean zunba egongo da Egaña gunean.
Bestalde, 18:00etan Malen jaietako txupinazoa botako da, eta ondoren, Erraldoi eta Buruhandien konpartsaren eta txistu taldearen kalejira egongo da. Gero, dultzaineroen txanda izango da. Horrez gain, 19:00etan, esku pilota jaialdia egongo da Miruaitzen, eta iluntzean, Gure Ametsa Dantza Taldeak Larrain dantza herrikoia egingo du Goiko Plazan.
20:30ean txaranga a la mutrikuarra aterako da kalerik kale, eta 23:00etan Mandazketa elkarteak antolatutako danborrada egongo da. Egunari amaiera emateko, DJ Urgozo, eta DJ Farrukitas igoko dira txosnaguneko oholtzara.
